Hlað­varparar segja fjölmiðla­nefnd stunda glassúrsgerð

Þetta eru þau Ólöf Skaftadóttir og Kristín Gunnarsdóttir hjá Komið gott, Birkir Karl Sigurðsson og Leifur Þorsteinsson sem eru með Chess after dark, Þórarinn Hjartarson sem rekur Eina Pælingu, Gísli Freyr Valdórsson sem er með Þjóðmál, Gurrý Jónsdóttir, Lína Birgitta og Sólrún Diego sem eru með spjallið auk þess sem undir bréfið ritar Hjörvar Hafliðason sem er með Dr. Football. 

Hjörvar, sem býr svo vel að eiginkona hans er framkvæmdastjóri SFS, lögmaðurinn Heiðrún Lind Marteinsdóttir, hefur þegar skráð sitt hlaðvarp hjá nefndinni en samkvæmt þessu er hann ekki sáttur. Þessir hlaðvarparar hafa staðið í stríði við fjölmiðlanefnd lengi vel og nú virðist sem þeir vilji láta sverfa til stáls.

Um bakara og smiði

Tilefni bréfsins er, sem fyrr segir, grein Elvu sem hún birti á Vísi í vikunni. Þar segir hún meðal annars að fjölmiðlanefnd, líkt og aðrar stjórnsýslustofnanir, þurfi að fara eftir þeim lögum sem gilda hverju sinni. „Henni er ekki heimilt að hætta að hafa eftirlit með tilteknum ákvæðum laga nema lögunum sé breytt á Alþingi. Annað rímar illa við stjórnarskrá og grundvallarhugmyndir um réttarríkið. Alþingi setur lög, en framkvæmdavaldið fylgir þeim eftir.“

Í grein sinni, sem heitir „Um bakara og smiði. Hlaðvörp og skráning þeirra hjá Fjölmiðlanefnd“, segir hún að það vilji loða við að bakarar séu hengdir fyrir smiði. Hlaðvarpararnir leggja út af þessu í grein sem þau kalla Glassúrfólkið:

Í grein sinni rekja þau að fjölmiðlanefnd hafi krafist þess að stjórnendur vinsælla hlaðvarpa skrái þætti sína sem fjölmiðla, ellegar megi þau búast við háum fjársektum.

Glassúrfólkið sem skapar ekkert

„Líkingin um bakarann og smiðinn er ágæt, en í hana vantar eina persónu. Smiðurinn er Alþingi, sem smíðar lögin. Bakararnir eru fólkið sem býr eitthvað til úr engu, oftast á kvöldin og um helgar, á eigin kostnað og eigin ábyrgð. Og svo er það glassúrfólkið.

Glassúrfólkið hvorki bakar né smíðar. Það kemur að kökunni þegar aðrir hafa bakað hana og skreytir hana reglum, eyðublöðum og sektarhótunum.

Og það fær greitt um hver mánaðamót, hvernig sem kakan bragðast.“

Og það er ljóst hver er glassúrsmiðurinn í þessari frásögn, nefnilega Fjölmiðlanefnd.

Þau að meðan Fjölmiðlanefnd fari um sjálfala sé ekkert Norðurlanda sem fari sömu leið. Og það sem meira er, Logi Már Einarsson, ráðherra málaflokksins, sé ósammála stefnu nefndarinnar. Engu að síður sæki hún, þrátt fyrir veikan lagagrunn, hart að hlaðvörpurum.

„Alþingi setti lögin, það er rétt. En það var nefndin sem samdi leiðbeiningar um skráningu hlaðvarpa, leiðbeiningar sem hún segir sjálf að séu „hvorki almenn lög né lögskýringargagn“. Og það var nefndin sem ákvað hvaða hlaðvörpum skyldi skrifað.“