„Þetta módel gengur bara ekki upp“

Líftæknifyrirtækið Genís hefur verið rekið á Siglufirði í rúm tuttugu ár. Róbert fullyrðir að fyrirtækið hafi þróað leiðir til að nota náttúruleg efni til að laga sködduð bein.

„Þetta örvar vöxt beinfrumanna og grær hraðar og verður heilbrigt bein úr því.“

„Þetta hefur tekið langan tíma, þetta hefur kostað mikið af peningum og nú erum við bara svo komin að við erum búin með dýratilraunir og þurfum að fara í mannatilraunir og koma þessu inn á markað sem tekur svona eitt og hálft til tvö ár í viðbót til að koma fyrstu vörunni á markað. En þá dettur inn stóri kostnaðurinn,“ sagði Róbert í samtali við Kristján Kristjánsson í þættinum Sprengisandi á Bylgjunni.

Erfitt hafi verið að fá íslenska fjárfesta til að fjármagna þessa vegferð. Róbert segir gott að reka sprotafyrirtæki á Íslandi en þegar þeim takist vel til og þau þurfi að ganga lengra í markaðssetningu þá sé lítið að fá. Búið sé að fjárfesta mörgum milljörðum króna í starfsemi Genís frá stofnun en nú sé komið að kaflaskilum.

„Ég hef borið hitann og þungann af fjárfestingunum í Genís á síðustu árum. En nú er bara komið þar að ég hef ekki það djúpa vasa að ég geti tekið þessi næstu skref. Og þá þurfa annað hvort aðrir að koma að því eða betra er að félagið fari bara í hendurnar á einhverjum sem hafa langtímahugsun og eru tilbúnir að taka svona verkefni alla leið inn á markað og byggja upp eitthvað stórt.“

Róbert tilkynnti nýlega að eftir mánaðalanga leit að fjárfestum innanlands þyki honum ljóst að engar forsendur séu fyrir frekari vexti fyrirtækisins á Íslandi. Þannig sé nú unnið að því að selja félagið og færa starfsemina í hagfelldara umhverfi.

Hagi sér líkt og trillukarlar

Róbert hefur stundum líkt hugarfari íslenskra fjármagnseigenda við „trillukarlasyndromið.“

„Því vinir mínir sem eru trillukarlar fara oft út að veiða og þeir vilja helst sjálfir selja fiskinn á markaði, fá borgað og bíða svo bara eftir næstu veiðiferð. Nú, ef það gengur illa, þá er ekki farin nein sólarlandaferð. En ef það gengur vel, þá eru farnar tvær. Og við hegðum okkur í heildina svolítið svona.“

„Það að við séum að byggja upp fyrirtæki sem eru mjög flott, eru gæfuleg og ættu að geta búið til framtíðartekjur og framtíðarskatttekjur inni í þjóðfélagið en við seljum þau alltaf frá okkur.“

Í því samhengi nefnir Róbert til að mynda Marel, Össur, Bakkavör og CCP. Hann nefnir að Össur hafi á sínum tíma keypt stærra bandarískt fyrirtæki sem heitir Flex með aðkomu Kaupþings.

„Úr þessu varð þetta stóra, flotta fyrirtæki en það var selt frá Íslandi. Marel var selt frá Íslandi, Bakkavör er í Bretlandi og ég spyr mig því alltaf, erum við bara alltaf eins og trillukarlinn?“ Marel og Bakkavör hafi sömuleiðis stækkað rekstur sinn með því að taka yfir rekstur stærri erlendra fyrirtækja.

„Við eigum líka að hafa þann þroska þá að selja það bara ekki alltaf frá okkur. Við eigum að ganga í gegnum súrt og sætt með svona félögum, fá síðan skatttekjur af þeim, fá háar launatekjur og halda utan um þetta. Ekki hlaupa alltaf frá því og losa okkur við það og fagna svo bara þessum eingreiðslum eins og eins og fjármálaráðherra gerði þegar hann fékk 40 milljarða tékka fyrir skatta af Kerecis. Það mun sennilega ekki fá neinar skatttekjur í framtíðinni af því nema af launum starfsmanna.“

Þurfi að hugsa meira til framtíðar

Róbert vill að bankarnir, lífeyrissjóðir og aðrir aðilar sem fari með fjármagn á Íslandi endurskoði stefnu sína og hugsi meira til framtíðar.

„Ég á þá einföldu lífssýn í þessu: Því meira sem þú átt, því lengri tíma áttu að hugsa og fjárfesta. Það gengur ekkert upp að allt fjármagnið á Íslandi sé að eltast við skammtímahagnað og sé að eltast við eða notfæra sér einhverja verðbólgu og háa vexti. Og líta ekki við langtímanum. Þetta módel gengur bara ekki upp.“

„Í dag er það þannig að það er enginn íslenskur banki sem gæti tekið fyrirtæki eins og Genís og farið og selt það á alþjóðamarkaði. Það eru allir að vinna innanlands. Allir að gera það sama og þjóna peningum lífeyrissjóðanna.

Það er enginn að hugsa um að stækka kökuna. Hvernig getum við búið til stærri köku, aflað meiri tekna til þess að efla þetta þjóðfélag og efla vinnumarkaðinn á Íslandi?“

Leiti ekki til íslenskra fjárfesta í örvæntingu

Róbert hvetur þingmenn til að styðja þingfrumvarp sem auki rými lífeyrissjóða til að fjárfesta í óskráðum félögum en lífeyrissjóðir fara með stóran hluta fjármagns á Íslandi. Það sé erfitt fyrir lítil félög eins og Genís að vera skráð á hlutabréfamarkaði.

Róbert segir næsta skref að fara erlendis ásamt Sesselju Ómarsdóttur forstjóra Genís til að kynna fyrirtækið og leita fanga. Fyrsta sýningarferðin verði farin eftir páska.

„Ég ætla að taka það skýrt fram: Ég er ekki að koma hér í viðtal við þig eða fara fram þarna með þennan Facebook-status minn í einhverju örvæntingarkasti til fjármagnsins á Íslandi.

Ég er bara fyrst og fremst að reyna að segja að við erum á rangri leið og við eigum að hafa þroska til þess að gera hlutina öðruvísi. Við erum það ríkt land, við eigum það gott menntunarstig, við eigum það gott vinnuafl, að við eigum ekki að hegða okkur svona.“