Viður­kennir ó­ná­kvæmt svar um fundi án Harðar

Ráðherrann flutti munnlega skýrslu um málefni Landsvirkjunar og samskipti ráðuneytisins við félagið. Bergþór Ólason og Guðlaugur Þór Þórðarson spurðu hann í kjölfarið um fundi án forstjórans og upplýsingar sem ráðherrann hefði veitt Alþingi um starfslok hans.

Bergþór vísaði til ummæla Daða Más frá 26. október um að engir stjórnarfundir hefðu farið fram án Harðar. Hann spurði hvers vegna ráðherrann hefði fullyrt það þegar gögn málsins sýndu annað.

„Það er rétt að þetta var ekki gott og nákvæmt svar varðandi stjórnarfundina,“ svaraði Daði Már.

Hann sagði að fundirnir sem Hörður hefði ekki setið hefðu verið haldnir vegna minnisblaðs forstjórans um stjórnarhætti.

Segir fundina hafa varðað málefni Harðar

Bergþór spurði hvernig fundirnir samræmdust 6. grein laga um Landsvirkjun, þar sem segir að forstjóri skuli eiga sæti á stjórnarfundum. Hann spurði hvort lagalegt mat hefði legið að baki því að halda fundina án Harðar.

Daði Már sagði forstjóra Landsvirkjunar alltaf hafa vikið af stjórnarfundum þegar málefni hans sjálfs væru rædd. Umræddir fundir hefðu allir varðað málefni sem tengdust Herði.

Ráðherrann sagðist jafnframt telja sig hafa fundað án forstjóra með stjórnum allra eða nær allra ríkisfyrirtækja eftir að nýjar stjórnir tóku við. Hann tók fram að þar talaði hann eftir minni.

Styður athugun en lofar ekki greiðum aðgangi að fundargerðum

Bergþór spurði hvort ráðherrann myndi styðja að stjórnskipunar- og eftirlitsnefnd fengi öll gögn málsins óstytt og kannaði sjálfstætt framgöngu hans og ráðuneytisins.

Daði Már sagðist styðja að nefndin færi yfir gögnin.

„Það væri bara jákvætt og gott, það myndi ég styðja.“

Bergþór sagðist þegar hafa fengið synjun frá stjórn Landsvirkjunar um aðgang að fundargerðum frá afmörkuðu tímabili á árinu.

Daði Már sagði ríkið aldrei hafa óskað eftir fundargerðum ríkisfyrirtækja. Hann gæti því ekki lofað fyrir fram að auðvelt yrði að fá fundargerðir Landsvirkjunar, en sagðist myndu sýna beiðni um þær skilning.

Guðlaugur segir upplýsingar hafa vantað

Guðlaugur Þór sagði Daða Má ekki hafa uppfyllt upplýsingaskyldu sína gagnvart Alþingi þegar hann svaraði fyrirspurn um starfslok Harðar 19. október.

Hann vísaði til 50. greinar þingskapalaga, sem skyldar ráðherra til að leggja fram upplýsingar sem þeir hafa aðgang að og hafa verulega þýðingu fyrir mat þingsins á málinu.

Guðlaugur sagði ráðherrann hafa vitað af bréfi Harðar þar sem forstjórinn lýsti áhyggjum af því að pólitísk afskipti gætu gert Landsvirkjun óstarfhæfa. Ráðherrann hefði ekki greint þinginu frá því þegar spurt var um ástæður starfslokanna.

„Hver einasti landsmaður er búinn að sjá að það var ekki sagan öll.“

Daði Már svaraði að ráðuneytið hefði lagt fram allar upplýsingar sem tengdust málinu. Guðlaugur ítrekaði þá spurningu sína um hvers vegna upplýsingarnar hefðu ekki komið fram í svarinu 19. október.

„Þær upplýsingar hafa verið dregnar fram af stjórnarandstöðunni og fjölmiðlum þessa lands.“

Stendur við fyrra svar og treystir stjórninni

Daði Már sagði bréf Harðar hafa fjallað um stjórnarhætti og hafnaði aftur ásökunum um pólitísk afskipti.

„Það hafa engin pólitísk afskipti verið á hendi fjármála- og efnahagsráðuneytisins varðandi Landsvirkjun, engin.“

Hann sagði fundi sína með stjórninni hafa snúist um stjórnarhætti en ekki rekstrarmálefni fyrirtækisins.

Í skýrslu sinni sagðist Daði Már hafa verið upplýstur um ágreining stjórnar og forstjóra 11. september. Hann stóð við svar sitt frá 19. október um að ágreiningurinn hefði varðað stjórnarhætti og samskipti en ekki stefnu fyrirtækisins.

„Ég stend því fyllilega við svar mitt og vísa ásökunum um ósannsögli á bug.“

Stjórn Landsvirkjunar nyti áfram fulls trausts hans til að ráða nýjan forstjóra. Hann hvorki gæti né vildi hafa afskipti af þeirri ráðningu.