Elkem segir toll­frelsi geta skilað 350 milljónum á ári

Tímabundinn tíu prósenta viðbótartollur Bandaríkjanna rann út 24. júlí. Álfheiður Ágústsdóttir, forstjóri Elkem á Íslandi, segir verksmiðjuna nú aftur í sömu stöðu og áður en umfangsmiklar tollabreytingar hófust í Bandaríkjunum.

Munurinn sé sá að vörur frá mörgum helstu samkeppnisríkjum beri áfram viðbótartolla.

„Það sem er kannski ólíkt núna er að nú stöndum við með 0% tolla á meðan til að mynda Noregur er með 12,5% og Bretland og ESB með 10%,“ segir Álfheiður.

Hún segir áhrifin á rekstur verksmiðjunnar veruleg.

„Miðað við núverandi útflutning þá er þetta 300 til 350 milljónir,“ segir Álfheiður og segir upphæðina skila sér í bættri afkomu af sölu til Bandaríkjanna.

Tollkjörin geti einnig skapað færi á aukinni sölu vestur um haf.

„Þetta svo sannarlega opnar á tækifæri til þess,“ segir Álfheiður.

Hún setur þó fyrirvara við hversu lengi núverandi staða haldist. Tollastefna Bandaríkjanna hafi breyst ört og pólitísk óvissa hafi áhrif á ákvarðanir fyrirtækja um sölu og markaði.

Kvótar takmarka sölu til Evrópu

Staðan er önnur gagnvart Evrópusambandinu. Þar tóku verndarráðstafanir á innflutningi kísiljárns gildi í nóvember og ná þær einnig til Íslands.

Ákveðið magn má flytja tollfrjálst inn á hverju tímabili. Umfram það getur lagst breytilegur tollur á vöruna ef innflutningsverðið er undir viðmiði sambandsins.

„Við í rauninni erum bara að selja upp að því hámarki sem okkur er leyft í hverjum ársfjórðungi og svo erum við að sækja inn á aðra markaði,“ segir Álfheiður.

Sjávarafurðir einnig tollfrjálsar

Samtök fyrirtækja í sjávarútvegi staðfesta í svari við fyrirspurn Vísis að íslenskar sjávarafurðir og eldisafurðir séu nú fluttar tollfrjálst til Bandaríkjanna.

Samtökin telja að staðan geti styrkt samkeppnisstöðu íslenskra afurða þar sem vörur frá Noregi, Bretlandi og Evrópusambandinu bera nú viðbótartolla.

Utanríkisráðuneytið staðfestir einnig að núll prósenta tollur gildi áfram um íslenskar sjávarafurðir og kísiljárn. Álvörur sæta hins vegar áfram sérstökum þjóðaröryggistollum sem Bandaríkin leggja á slíkar vörur frá öllum ríkjum.

Vara við örum breytingum

Utanríkisráðuneytið segir Ísland nú standa betur að vígi á Bandaríkjamarkaði en mörg helstu nágrannaríki og samkeppnisríki. Staðan geti þó breyst hratt.

„Þetta umhverfi er hins vegar síbreytilegt og tollastefna núverandi stjórnvalda í Bandaríkjunum óútreiknanleg,“ segir í svari ráðuneytisins.

Þar er meðal annars vísað til nýjustu vendinga í samskiptum Bandaríkjanna og Kanada. Eins og Vísir greindi frá slitnaði nýlega upp úr tollaviðræðum ríkjanna. Bandaríkin lögðu í kjölfarið tolla á ýmsar kanadískar vörur og kanadísk stjórnvöld hafa boðað sambærileg viðbrögð.

Ráðuneytið segir Ísland hafa verið ýmist í betri, sambærilegri eða verri stöðu en helstu samkeppnisríki frá því núverandi Bandaríkjastjórn tók við. Því sé fylgst náið með þróuninni og íslenskum hagsmunum komið á framfæri við bandarísk stjórnvöld þegar tilefni sé til.