Lýsa eftir þekktum öfgamanni

Það var kona sem lét lífið. Þrír særðust lífshættulega, átta alvarlega og fimm lítillega.

Abdul B er sagður hafa verið í bílnum og flúið úr honum, mögulega með öðrum. Svo virðist einnig sem að Abdul hafi stungið að minnsta kosti einn á flóttanum.

Sjá einnig: Minnst einn látinn á Pride-hátíð í Ber­lín

Verði fólk vart við Abdul hefur lögreglan ítrekað að hann sé mögulega vopnaður og sé hættulegur. Lögreglan hafði áður sagt að hinn grunaði í málinu tengdist íslömskum öfgahreyfingum í Berlín.

AP fréttaveitan hefur eftir talsmanni lögreglunnar að ekkert liggi fyrir hvað varðar tilefni árásarinnar.

Abdul er grunaður um að hafa ekið sendiferðabíl inn í þvögu fólks í Berlín en hann endaði á tréi og flúði af vettvangi á hlaupum.

Friedrich Merz. kanslari Þýskalands, hefur fordæmt árásina. Hann heitir því að hún verði rannsökuð ítarlega og refsað verði fyrir hana.

Mikið um sambærilegar árásir

Árásir sem þessar hafa verið nokkuð tíðar í Þýskalandi á undanförnum árum.

Í maí dóu tveir og þrír særðust alvarlega þegar maður ók bíl sínum eftir göngugötu í Leipzig. Þá var 33 ára þýskur maður handtekinn og var hann talinn eiga við geðræn vandamál að stríða.

Tveir létu lífið og ellefu særðust þegar fertugur maður ók á gangandi vegfarendur í Mannheim í mars í fyrra. Sá var einnig talinn glíma við geðræn vandamál og fundust engar vísbendingar um tiltekið tilefni.

Mánuði áður, í febrúar, ók 24 ára maður inn í þvögu fólks í München og myrti konu og tveggja ára dóttur hennar. Tugir til viðbótar særðust. Verið er að rétta yfir manninum sem er 24 ára gamall og frá Afganistan. Hann er sagður vera öfgamaður og íslamisti.

Þá dóu sex og rúmlega tvö hundruð særðust í árás á jólamarkað í Magdeburg í desember 2024. Maður frá Sádi-Arabíu var dæmdur í lífstíðarfangelsi í síðasta mánuði fyrir árásina. Hann var sagður hafa gert árásina að hluta til vegna fordóma í garð múslíma og er sagður aðhyllast fjarhægriöfl.

Í júní 2022 ók 29 ára Þjóðverji inn í þvögu fólks í Berlín. Þá dó kennari og fjórtán nemendur hennar særðust. Þá var árásarmaðurinn einnig sagður eiga við geðræn vandamál að stríða.

Fimm létu lífið, þar á meðal ungabarn, og fimmtán særðust í Trier í desember 2020 þegar 51 árs gamall ölvaður Þjóðverji ók á göngugötu.

Í febrúar það sama ár ók maður á tugi manna og barna á hátíð í Volkmarsen. Enginn lét lífið en maðurinn var dæmdur í lífstíðarfangelsi fyrir fjölmargar morðtilraunir.

Í desember 2016 myrti hælisleitandi frá Túnis, sem sagður er hafa tengst öfgahópum, ökumann sendiferðabíls í Berlín. Hann stal bílnum og ók honum inn í þvögu fólks á jólamarkaði. Ellefu létu lífið og tugir særðust. Maðurinn, sem hét Anis Amri, var skotinn til bana af lögregluþjónum á Ítalíu nokkrum dögum síðar.