Jón Ás­geir fær ekki meira frá ríkinu

Baugsmálið má rekja aftur til upphafs aldarinnar og sneri að málaferlum ríkissaksóknara og á hendur eigendum fjárfestingafélagsins Baugs Group hf. sem rak matvælaverslanir og stundaði verðbréfaviðskipti.

Jón Ásgeir, þáverandi stjórnarformaður Baugs, var meðal sakborninga og var eftir langa rannsókn og málaferli dæmdur fyrir skattalagabrot og til skilorðsbundinnar fangelsisrefsingar og sektar í Hæstarétti árið 2013. 

Málið var síðar endurupptekið og árið 2022 féll dómur í Hæstarétti þar sem hluta sakargifta var vísað frá héraðsdómi en hann þó áfram sakfelldur fyrir meiri háttar skattalagabrot. Í þeim dómi var ákveðið að Jóni Ásgeiri skyldi ekki gerð sérstök refsing.

Gestur Jónsson, verjandi Jóns Ásgeirs, skrifaði grein á Vísi árið 2022 þar sem hann taldi dóminn marka endalok Baugsmálsins. 

„Jón Ásgeir fæddist árið 1968 og var því þrítugur við upphaf þessarar sögu. Af reynslu get ég sagt að fátt reynist manni erfiðara í lífinu en að vera borinn sökum um refsivert brot. Að meðferð refsimáls á hendur einstaklingi taki meira en tuttugu ár vona ég að gerist aldrei aftur,“ sagði Gestur Jónsson í greininni.

Málinu var þó ekki alveg lokið því í kjölfarið krafðist Jón Ásgeir þess að ríkið endurgreiddi honum stærri hluta þeirrar sektar sem hann hafði greitt samkvæmt dómnum frá 2013. Hann taldi jafnframt að hann ætti rétt á frekari vöxtum af endurgreiðslunni og krafðist einnig 10 milljóna króna í miskabætur..

Héraðsdómur Reykjavíkur hafnaði kröfum Jóns Ásgeirs og taldi hann ekki hafa sýnt fram á að hann ætti rétt á frekari endurgreiðslu. Landsréttur komst að sömu niðurstöðu í dómnum sem kveðinn var upp í dag.

Í dómi réttarins segir að Jóni Ásgeiri hafi ekki tekist að sanna að hann ætti rétt á frekari greiðslum frá ríkinu umfram það sem þegar hafði verið endurgreitt. Sama átti við um kröfu hans um frekari vexti. Þá var íslenska ríkið einnig sýknað af kröfu hans um miskabætur.

Jafnframt var áréttað að um væri að ræða almennt einkamál sem félli undir lög um meðferð einkamála en ekki mál sem lyti að innheimtu sektar.

Með dómnum fyrir Landsrétti má telja líklegt að Baugsmálinu sé lokið þó ekki megi útiloka að Jón Ásgeiri óski eftir áfrýjunarleyfi til Hæstaréttar sem veitir þau aðeins í einstaka tilfellum.