Kín­verjarnir selja sig út úr Elkem

Bluestar er fyrir viðskiptin meirihlutaeigandi Elkem með 52,9 prósenta eignarhlut. Aðrir eigendur eru að mestu norskir lífeyris- og fjárfestingarsjóðir, sem fara með miklum mun minni eignarhluti en kínverska félagið. Þannig er Folketrygdfondet, fjárfestingarsjóður almannatrygginga Noregs, næststærsti hluthafinn með 3,65 prósenta hlut.

Engin áhrif á Grundartanga

Samkvæmt fréttatilkynningu frá Elkem verður kaupverðið allt greitt með því að Bluestar heldur eftir svokallaðri silíkonadeild félagsins (e. silicones). Silíkonar eru framleiddir úr mikið unnum kísli og eru notaðir í nánast allt milli himins og jarðar, allt frá tölvuíhlutum til sjampós.

Hinar tvær deildir Elkem, sem eftir standa, eru sílíkonvörur (e. silicon products), sem framleiðir meðal annars kísilmálm og kísiljárn, og kolefnisvörur (e. carbon solutions). Rekstur Elkem á Íslandi tilheyrir þeirri fyrrnefndu og því hafa breytingarnar engin áhrif á reksturinn hér á landi, að sögn Álfheiðar Ágústsdóttur, forstjóra Elkem á Íslandi.

Gagnist öllum hluthöfum

„Eftir yfirgripsmikið mat á öllum tiltækum valkostum er það staðföst trú Elkem að gerð samningsins skili hagstæðustu niðurstöðunni fyrir bæði silíkonadeildina og fyrirtækið, sem að lokum gagnast öllum hluthöfum. Sem stærsti hluthafi Elkem og fyrrverandi eigandi hluta af eignum silíkonadeildarinnar býr Bluestar yfir djúpstæðri þekkingu á silíkonadeild Elkem og hefur það að stefnu að þróa stöðu sína í virðiskeðju kísiliðnaðarins,“ segir í fréttatilkynningu Elkem.

Þá segir að salan sé háð samþykki hluthafafundar, samþykki lánardrottna og öðrum hefðbundnum fyrirvörum.