Strætómiðinn mun kosta 690 krónur eftir ára­mót

Strætó greinir frá því í fréttatilkynningu að ný gjaldskrá taki gildi þann 6. janúar næstkomandi samkvæmt ákvörðun stjórnar. Nemur hækkunin þremur prósentum á stökum fargjöldum en 3,6 prósentum á tímabilskortum.

Stakt fargjald fyrir fullorðna fer þannig úr 670 krónum í 690 krónur og 30 daga nemakort og kort fyrir ungmenni og aldraða fer úr 5.600 krónum í 5.800 krónur. Verð á Klapp plastkortum helst óbreytt eða 1.000 krónur.

Ákvörðun um gjaldskrárbreytingu var tekin af stjórn félagsins á fundi þess 10. október síðastliðinn og er í samræmi við gjaldskrárstefnu stjórnar Strætó um að verð hækki í takt við áætlaða hækkun neysluverðsvísitölu.

Strætó endurskoðar gjaldskrá sína tvisvar á ári en stjórn félagsins sleppti því að hækka fargjöld í sumar. Þau voru því síðast hækkuð 8. janúar 2025.