Aug­lýsi sjúk­dóma til að komast fram hjá reglum

Í nýjasta Neytendablaðinu – tölublaði Neytendasamtakanna er fjallað um ólögmæta markaðssetningu á lyfseðilsskyldum lyfjum.

Í Evrópu gilda strangar reglur um markaðssetningu á lyfjunum og er alfarið bannað að beina henni að almenningi. Framkvæmdastjóri Neytendasamtakanna segir að borið hafi á því að lyfjafyrirtæki dansi á línunni og auglýsi í staðinn sjúkdóma og heilsufarskvilla undir yfirskini vitundarvakningar. Tiltekið lyf sé þá aldrei nefnt á nafn en sjúkdómseinkenni tíunduð og fólki jafnvel bent á að spyrja lækni sinn út í málið.

Novo Nordisk yfir strikið

Brynhildur Pétursdóttir, framkvæmdastjóri Neytendasamtakanna, segir að franska lyfjastofnunin hafi nýverið talið lyfjafyrirtækið Novo Nordisk fara yfir strikið þegar það fór í umfangsmikla auglýsingaherferð á samfélagsmiðlum um offitu og hvatti konur sérstaklega til að taka málin í eigin hendur og hefja samtal við lækni.

„Og þó að þar hafi ekki verið nefnd nein lyf þá var litið þannig á að þessi mikla fjölmiðlaumfjöllun sem hefur verið um tiltekin þyngdarstjórnunarlyf, að í ljósi þess hvað það hafði verið mikil umræða, þá væri alveg ljóst hvaða lyf væri um að ræða, þannig að ef konur færu að tala við lækninn sinn þá væru þær að fara að biðja um alveg ákveðin lyf. Þetta er svona, þetta er mjög matskennt og fyrirtækið dansaði á þarna einhverri línu en þarna var bara metið sem svo að þeir fóru yfir línuna og gengu of langt.“

Borið á sambærilegum herferðum

Brynhildur segir að borið hafi á sambærilegum auglýsingaherferðum hér heima.

„Og við sendum fyrirspurn á Lyfjastofnun sem segist vera að skoða málið og að þeirri skoðun sé ekki lokið. Þannig að það er alveg áhugavert að vita hvernig Lyfjastofnun metur þetta hérna heima vegna þess að við teljum auðvitað bara mjög mikilvægt að þessum lögum sé fylgt.“

Sú athöfn að auglýsa sjúkdóm... það er væntanlega einhver tilgangur þar að baki, þetta er ekki bara einhver vitundarvakning eða hvað?

„Nei, þetta er einmitt alltaf svona látið liggja af því að þetta sé vitundarvakning og auðvitað geta neytendur fengið einhverjar upplýsingar en auðvitað er markmiðið fyrst og fremst hjá lyfjaframleiðendum að selja lyf, það liggur alveg í augum uppi. Þannig að þess vegna er svo mikilvægt að eftirlitsstofnanir skoði málin hratt og vel og þessir hagsmunir neytenda séu alltaf hafðir í fyrirrúmi.“