Prís neitar að frysta verð

VR, LÍV og Fagfélögin sendu verðmótandi fyrirtækjum bréf í síðustu viku og óskuðu svara um hvað þau ætli að leggja af mörkum svo að kjarasamningar geti haldið gildi sínu. Nokkur fyrirtæki hafa þegar brugðist við áskorun félaganna. SS hefur skuldbundið sig til að fresta verðhækkunum fram í janúar og um helgina var greint frá því að Bera, móðurfélag Ölgerðarinnar, Danól, Gæðabaksturs, Kjarnavara og fleiri vörumerkja, hefði  heitið því að hækka ekki verð framleiðsluvara sinna um áramótin, umfram verðbólgumarkmið Seðlabankans.

Þá tilkynnti Krónan í gær að hún hefði fryst verð á 647 vörum undir vörumerkjunum Krónan, Krónan Lífrænt, Krónan Ódýrt, First Price, Grön Balance og Gestus. Verðfrystingin stendur til og með 31. desember 2026.

Í fréttatilkynningu frá Prís segir að í framhaldi af ákalli frá verkalýðshreyfingunni um sameiginlegt átak gegn verðbólgu og af frétt um að Krónan hafi fryst verð vilji Prís koma eftirfarandi á framfæri:

Ekki tímabundin aðgerð að halda verði niðri

„Prís hefur verið ódýrasta matvöruverslunin í öllum verðkönnunum ASÍ frá opnun fyrir tveimur árum. Lágt verð allt árið um kring er skýr stefna og loforð Prís til viðskiptavina sinna. Það hefur Prís efnt frá upphafi og er staðráðið í að gera það áfram. Þegar Prís var opnað hafði ný lágvöruverðsverslun ekki verið opnuð á Íslandi í 24 ár, en fátt er betri vörn gegn verðbólgu en hörð samkeppni.“

Prís fagni því að fleiri leggi sitt lóð á vogarskálarnar við að sporna gegn verðbólgu. Fyrir Prís sé lágt verð hins vegar ekki tímabundin aðgerð heldur einföld og skýr stefna.

„Okkar leið er einföld. Við erum ódýrust og ætlum að vera það áfram, ekki bara á ákveðnum vörum í ákveðinn tíma. Við leitum allra leiða til að halda kostnaði og verði niðri fyrir heimilin. Þegar kemur að heimilisútgjöldum skiptir heildarkostnaður matarkörfunnar meira máli en hversu margar einstakar vörur eru frystar í verði tímabundið,“ er haft eftir Birtu Ósk Friðbertsdóttur, markaðsstjóra Prís.

Fylgjast náið með þróun

Þá segir að í verðkönnun ASÍ frá því í ágúst hafi komið fram að matarkarfan hjá Krónunni kostaði 19.522 krónur en hjá Prís 17.433 krónur. Munurinn sé þar um 11,9 prósent á verði matarkörfunnar. Að jafnaði hafi kannanir ASÍ sýnt 4 til 12 prósenta mun á milli verslananna tveggja. Spara megi talsvert með því að versla í ódýrustu verslun landsins og sporna gegn verðbólgu um leið.

Prís muni áfram fylgjast náið með þróun innkaupaverðs, kostnaðar og verðlags og leita leiða til að skila mögulegum kostnaðarlækkunum áfram til viðskiptavina. 

„Við ætlum ekki að bíða eftir sérstökum herferðum til að bjóða lægsta verðið. Þetta er verkefni sem við vinnum að alla daga. Besta verðbólguvörnin er að versla þar sem er ódýrast,“ er haft eftir Birtu Ósk að lokum.