Andrés prins af­salar sér öllum titlum í kjöl­far á­sakana

Hann mun áfram vera prins í ljósi þess að hann er sonur Elísabetar II Bretlandsdrottningar.

Sky News greinir frá þessu en talið er að fyrrverandi eiginkona hans, Sarah Ferguson, muni einnig hætta að nota titilinn hertogaynjan af York.

„Í viðræðum við konunginn og nánustu fjölskyldu mína höfum við komist að þeirri niðurstöðu að áframhaldandi ásakanir um mig beina athyglinni frá starfi hans hátignar og konungsfjölskyldunnar,“ sagði Andrés prins í yfirlýsingu. 

„Ég hef ákveðið, líkt og ég hef alltaf gert, að setja skyldu mína gagnvart fjölskyldu minni og landi í fyrsta sæti. Ég stend við þá ákvörðun mína fyrir fimm árum að hætta að sinna opinberum störfum,“ bætir Andrés við.

„Með samþykki hans hátignar teljum við að ég verði nú að ganga skrefinu lengra. Ég mun því ekki lengur nota titil minn eða þau heiðursmerki sem mér hafa verið veitt.“

„Eins og ég hef áður sagt, þá neita ég staðfastlega ásökununum gegn mér.“

BBC greinir frá því að dætur Andrésar, Beatrice og Eugenie muni halda sínum titlum en Andrés muni ekki eyða jólunum með konungsfjölskyldunni í Sandringham. Samt sem áður er búist við að hann muni áfram búa á heimili sínu Royal Lodge í Windsor þar sem hann sé með leigusamning til ársins 2078.

Sendi pósta á Epstein

Ákvörðunin kemur í kjölfar aukins þrýstings á Andrés prins eftir að fleiri fréttir komu fram um samband hans við barnaníðinginn Jeffrey Epstein og samband hans við meintan kínverskan njósnara.

Andrés hefur verið gagnrýndur harðlega vegna tengsla sinna við kynferðisbrotamanninn Jeffrey Epstein og hafa ríkt spurningar um það hvenær hann hafi í raun slitið á samskipti við hann.

Í frægu viðtali við BBC Newsnight sagði Andrés prins að hann hefði slitið öllum tengslum við Epstein eftir að þeir voru myndaðir saman í New York í desember 2010.

Þrátt fyrir þetta hafa komið fram tölvupóstar sem sendir voru mánuðum síðar og benda til þess að þeir hafi haldið sambandi.

Fréttin er í vinnslu.