Segir stefna í að Vélfag verði lagt niður vegna þvingananna

Morgunblaðið hefur eftir Ivan Nicolai Kaufmann, meirihlutaeiganda Vélfags í gegnum félag sem er skráð í Hong Kong, að leyfi og eignir félagsins verði seldar til Kanada eða Noregs ef hann þurfi að leggja fyrirtækið niður.

Viðskiptaþvinganirnar sem Vélfag sætir eru hluti af aðgerðum Íslands, Noregs og Evrópusambandsins gegn rúsneskum fyrirtækjum vegna innrásar Rússa í Úkraínu. Fyrri eigandi Vélfags, rússneska fyrirtækið Norebo, er talið tengjast svonefndum skuggaflota Rússa, flota skipa sem þeir nota til þess að komast í kringum refsiaðgerðir og fremja skemmdarverk gegn vestrænum ríkjum.

Kaufmann heldur því fram við blaðið að Norebo tengist Vélfagi ekki lengur. Norebo hafi selt Titania Trading Limited í Hong Kong fyrirtækið árið 2023. Sjálfur hafi Kaufmann keypt Titania af norskum aðila í maí á þessu ári án þess að vita af viðskiptaþvingunum.

Þegar Ríkisútvarpið fjallaði um aðgerðirnar gegn Vélfagi á dögunum kom fram að Kaufmann væri talinn samstarfsmaður eigenda Norebo. Morgunblaðið segir að samkvæmt sínum heimildum séu kaup Kaufmann á Titania talin hafa verið til málamynda.

Nafn Kaufmann þessa, sem Morgunblaðið segir að hafi fæðst í Liechtenstein en sé búsettur í Sviss, kom meðal annars fram í Panamaskjölunum svonefndu vegna aflandsfélags sem hann átti á Bresku Jómfrúareyjum.

Deilir á ráðuneyti og banka

Í viðtalinu við Morgunblaðið deilir Kaufmann hart á utanríkisráðuneytið og Arion banka sem hann sakar um að hafa komið ófaglega fram gagnvart sér og skort þekkingu á grundvallarhugmyndum og verkferlum í alþjóðlegum viðskiptum.

Ekki hafi verið tekið mark á gögnum sem hann hafi lagt fram og áttu að sýna að hann væri ekki tengdur Norebo.

Engu að síður hafi Vélfag fengið undanþágu frá frystingu fjármuna í síðasta mánuði.

Þá hafi stórar íslenska lögmannsstofur neitað að aðstoða hann. Það vill hann rekja til meints ótta þeirra við utanríkisráðuneytið og vera bendlaðar við mál sem gæti verið túlkað sem stuðningur við rússneska hagsmuni.