Næstlengsta þingdeila sögunnar nartar í hæla þriðja orkupakkans

Ljóst varð skömmu eftir klukkan níu í kvöld að veiðigjaldafrumvarpið hefði tekið fram úr Icesave. Ekki liggur alveg ljóst fyrir hvaða stjórnarandstöðuþingmaður var í pontu eða hvaða orð voru látin falla þegar þessum merka áfanga var náð en líklega eru það annað hvort Bryndís Haraldsdóttir eða Sigurður Ingi Jóhannsson samkvæmt mælendaskrá.

Um tíu mínútum eftir að annað sætið var tryggt var öðrum áfanga náð. Nanna Margrét Gunnlaugsdóttir þingmaður Miðflokksins hélt sína fyrstu ræðu um veiðigjaldafrumvarpið og þar með hafa allir þingmenn stjórnarandstöðunnar flutt sína 20 mínútna ræðu fyrir þingið.

Alþingi var sameinað í eina málstofu árið 1991. Þónokkur þingmál hafa fengið mikla umræðu síðan en aðeins fjögur náð yfir hundrað klukkustunda múrinn. Innleiðing EES-samningsins árið 1993 var rædd í rúmlega hundrað klukkustundir, Icesave-ábyrgðin var rædd í rúmlega 135 klukkustundir árið 2010 og loks trónir umræðan um þriðja orkupakkann á toppnum en hún var rædd í 147 klukkustundir árið 2019. Nú hefur veiðigjaldafrumvarpið náð 137. klukkustund sinni í pontu og því farið að seilast ískyggilega í nafnbót lengstu þingdeilu sögunnar.

Sérstaklega í ljósi þess að ekkert bendi til þess að umræðunni ljúki í bráð að svo komnu máli. Bryndís Haraldsdóttir þingkona Sjálfstæðisflokksins gekkst við því fyrr í dag í viðtali í Reykjavík síðdegis að stjórnarandstaðan væri að stunda málþóf. Hún sjálf flytur sína 42. ræðu um frumvarpið seinna í kvöld.