„Þetta eru mjög mikil von­brigði fyrir okkur“

Ársverðbólga mælist nú 4,2 prósent og eykst um 0,4 prósentustig frá því í síðasta mánuði. Sérfræðingar sem fréttastofa hefur rætt við í dag segja svo mikla hækkun hafa komið þeim í opna skjöldu. Verðbólgan sé nú yfir efri vikmörkum markmiðs Seðlabanka Íslands, sem hljóðar upp á fjögurra prósenta verðbólgu og líklegt sé því að stýrivöxtum verði haldið óbreyttum við næstu ákvörðun peningastefnunefndar í ágúst og mögulega út árið. Daði Már Kristófersson fjármálaráðherra segir nýjar verðbólgutölur mikil vonbrigði.

„Þetta eru mjög mikil vonbrigði fyrir okkur og við höfum lagt mjög mikið upp úr því oað stuðla að því og styðja Seðlabankann í því að ná niður verðbólgu.“

Hann segir ýmsar hækkanir hafa orðið sem ekki hafi verið búist við, meðal annars fór verð á flugfargjöldum til útlanda upp um 12,7 prósent.

„Það eru þarna liðir sem ættu ekki að vera að hækka. Krónan hefur verið mjög sterk og olíuverð er að lækka, við erum þess vegna mjög vonsvikin.“

Ráðherra segir hugsanlegt að bregðast þurfi við. „Við þurfum að grípa til aðgerða ef þetta heldur áfram, eins og ég segi, þarna á ekki að vera ástæða, þetta á ekki að vera kostnaðardrifin verðbólga þannig að við þurfum að fara yfir þetta nákvæmlega.“

Sumar hækkanirnar séu sveiflukenndar en skoða þurfi málið betur. „Ferðir eru þannig að þær sveiflast upp og niður en við þurfum bara að greina þetta nákvæmlega núna og velta fyrir okkur hvað við getum gert.“