Innlent

Létu rauða við­vörun ekki stoppa sig

Bjarki Sigurðsson skrifar
Þessir létu rauða viðvörun ekki stoppa sig í dag.
Þessir létu rauða viðvörun ekki stoppa sig í dag. Vísir/Bjarni

Þrátt fyrir rauða veðurviðvörun voru þónokkrir á ferð um miðbæ Reykjavíkur í dag. Ferðamenn í stuttu stoppi sem vildu ekki eyða deginum inni á hótelherbergi, fólk á leið heim úr vinnu og einn hlaupari sem þurfti að klára æfingu dagsins. 

„Það er æfing í dag. Það er ekkert hægt að sleppa þeim,“ segir Tómas Gíslason.

Þú lætur rauða viðvörun ekkert stoppa þig?

„Nei, ég spila þetta frekar öruggt. Ég er ekkert að fara í neina hættu. Ætlaði bara að klára þetta áður en versta veðrið kæmi.“

Tómas var klæddur í stuttbuxur þrátt fyrir allt. 

„Það eru alltaf stuttbuxur hjá mér. Ég held ég eigi ekki síðar buxur. Ef ég hreyfi mig nógu hratt, þá verður mér ekki kalt,“ segir Tómas. 

Tómas var viðbúinn í allt.Vísir/Bjarni

Vissi ekki af rauðri viðvörun

„Ég frétti í gær að það yrði appelsínugul viðvörun. Ferðunum mínum var aflýst en ég vildi skoða Reykjavík. Ég ákvað því að fara í gönguferð,“ segir Jeremy frá Belgíu. Hann vissi ekki að viðvaranirnar væru rauðar þegar fréttastofa náði tali af honum.

Þú röltir þá bara um í þessu?

„Já.“

Jeremy vildi ekki hanga á hótelinu því hann á flug af landi brott í fyrramálið.Vísir/Bjarni

Hvernig var það?

„Bara fínt.“

Ekki aðdáandi vindsins

Remy frá Spáni kvartaði ekki yfir rigningunni. Hins vegar er vindurinn ekki hans besti vinur. 

„Vindurinn er slæmur því hann fer í augun á mér. Hann lemur í andlitið en það er allt í lagi,“ segir Remy.

Remy er frá Spáni og kann vel við rigninguna.Vísir/Bjarni

Er þér ekki kalt?

„Nei, mér er ekki kalt. Nei, alls ekki.“ 

Veður Reykjavík Ferðaþjónusta Óveður 5. og 6. febrúar 2025

Mest lesið


Fleiri fréttir

Sjá meira


×

Mest lesið