Náðaði fólk sem beitti lög­reglu­þjóna of­beldi

Í heildina hafa rúmlega 1.200 verið dæmdir vegna árásarinnar á þinghúsið á undanförnum fjórum árum. Þar á meðal eru um tvö hundruð sem hafa játað að beita lögregluþjóna ofbeldi. Rúmlega 1.500 hafa verið ákærðir og af þeim málum sem hafa ratað í dómstóla hafa einungis tveir verið sýknaðir.

Enrique Tarrio, fyrrverandi leiðtogi Proud boys, fékk náðun en hann hafði verið dæmdur í 22 ára fangelsi. Honum hefur þegar verið sleppt úr fangelsi. Trump lét einnig sleppa fimm öðrum meðlimum samtakanna úr fangelsi, auk þess sem hann frelsaði Stewart Rhodes, leiðtoga Oath keepers og átta aðra meðlimi.

Óeirðir og árás eða dagur ástar?

Eins og frægt er er um að ræða stuðningsmenn Trumps sem ruddust inn í þinghús Bandaríkjanna þann 6. janúar 2021 með því markmiði að koma í veg fyrir formlega staðfestingu úrslita forsetakosninganna í nóvember 2021. Trump tapaði þessum kosningum gegn Joe Biden en hefur ítrekað haldið því ranglega fram að umfangsmikið kosningasvindl hafi kostað hann sigur og sigrinum hafi verið rænt af honum.

Fólk sem tók þátt í árásinni kallaði eftir því að Mike Pence, fyrrverandi varaforseti Trumps, yrði hengdur en Trump hafði sagt honum að neita að staðfesta úrslit, sem er eitthvað sem Pence hafði ekki vald til að gera.

Trump og bandamenn hans hafa á undanförnum fjórum árum varið miklu púðri í að endurskrifa söguna og breyta ímynd atburðanna í kjölfar taps hans árið 2020. Að miklu leyti hefur þessi hvítþvottur snúist um að stuðningsmenn Trumps, sem réðust inn í þinghúsið og veittust að lögregluþjónum, séu saklaus fórnarlömb.

Forsetinn hefur meðal annars lýst þessum degi sem „degi ástar“.

Trump sagði í gær að hann vonaðist til þess að fólkið, sem hann kallaði „gísla“ og „föðurlandsvini“ yrði sleppt úr fangelsi hið snarasta.

Þá sagði Trump að aðgerðir sínar myndu binda enda á langvarandi óréttlæti sem þetta fólk hefði verið beitt.

„Þau hafa þegar verið í fangelsi í langan tíma. Þessu fólki hefur verið rústað.“

Þetta sagði Trump samkvæmt New York Times. Lang flestir sem voru dæmdir vegna árásarinnar fengu mjög stutta fangelsisdóma.

Rannsóknin vegna árásarinnar er umfangsmesta sakamálarannsókn dómsmálaráðuneytis Bandaríkjanna.

Búist var við því að Trump myndi náða fólk sem tók þátt í árásinni en umfang aðgerða Trumps og hve fljótt hann beitti valdi sínu með þessum hætti kom samkvæmt AP fréttaveitunni á óvart. Margir innan Repúblikanaflokksins, þar á meðal JD Vance, varaforseti Trumps, höfðu sagt að ekki ætti að náða fólk sem hefði verið sakfellt fyrir ofbeldisglæpi, eins og fólk sem réðst á lögregluþjóna.

„Ef þú framdir ofbeldi þennan dag, áttu augljóslega ekki að vera náðaður,“ sagði Vance nýverið í viðtali við Fox. Hann bætti fljótt við að inná milli væru grá svæði.

Einn af þeim sem Trump náðaði var Jake Chansley, sem gengið hefur undir nafninu Qanon seiðmaðurinn. Hann var dæmdur í 41 mánaðar fangelsi vegna árásarinnar. Hann fagnaði náðuninni meðal annars á X og færði Trump þakkir. Þá sagðist hann ætla að fara að kaupa sér byssur.

Michael Fanone, fyrrverandi lögreglumaður í Washington DC, sem missti meðvitund og fékk hjartaáfall þegar óeirðarseggir réðust á hann og gáfu honum meðal annars raflost úr rafmagnsbyssu, hefur verið í forsvari fyrir lögregluþjóna sem ráðist var á við þinghúsið og í því.

„Þetta er það sem bandaríska þjóðin kaus. Hvernig á maður að bregðast við þessu?“

Hann sagðist á undanförnum árum hafa haft miklar áhyggjur af öryggi sínu og fjölskyldu hans. Þessar náðanir væru ekki að hjálpa til með þá tilfinningu.