Lögðu einnig til að ákæra Lindsay Graham og fleiri

Í heildina lagði ákærudómstóllinn til að 39 manns yrðu ákærð.

Þetta kemur fram í skýrslu ákærudómstólsins en hluti hennar var birtur í dag. Áhugasamir geta lesið skjalið hér.

Joe Biden, forseti, vann í Georgíu með 11.799 atkvæðum. Trump og bandamenn hans hafa þó ítrekað logið því fram að svindl hafi kostað hann sigur, þó endurtalningar hafi sýnt að svo sé ekki og að þeir hafi engar sannanir getað fært fyrir staðhæfingum sínum.

Beittu þeir ýmsum leiðum til að reyna að fá úrslitunum snúið.

Eins og áður segir voru Trump og átján aðrir ákærðir vegna viðleitni forsetans fyrrverandi og bandamanna hans til að snúa úrslitum kosninganna í Georgíu. Nokkrir þeirra eru sakaðir um að hafa reynt að stela kjörgögnum og eiga við kosningavélar.

Ákærurnar byggja á RICO-lögunum svokölluðu. Þau voru upprunalega sett til að auðvelda yfirvöldum að berjast gegn skipulagðri glæpastarfsemi. Allir nítján hafa lýst yfir sakleysi sínu.

Ákærudómstóll er fyrirbæri vestanhafs þar sem kviðdómendur eru fengnir til að fara yfir vitnisburði og gögn í ákveðnum málum og kanna hvort þeim þyki tilefni til að leggja fram ákærur vegna meintra brota.

Þessi tiltekni dómstóll varði sjö mánuðum í að ræða við 75 vitni, samkvæmt AP fréttaveitunni, og semja áðurnefnda skýrslu. Ákærudómstóllinn lauk störfum í desember en dómari komst að þeirri niðurstöðu að fresta ætti birtingu hluta skýrslunnar þar til búið væri að taka ákvörðun um ákærur. Saksóknarinn Fani Willis ákærði svo Trump og hina átján í ágúst.

Sjá einnig: Trump og átján aðrir ákærðir fyrir samsæri

Graham er eins og áður hefur komið fram sitjandi öldungadeildarþingmaður, frá Suður-Karólínu, en embættismenn þar hafa sagt að hann hafi, ásamt öðrum, þrýst á þá að hagræða úrslitunum.

Fjögur réttarhöld í vændum

Þetta mál er eitt af fjórum sem Trump stendur frammi fyrir. Jack Smith, sérstakur rannsakandi dómsmálaráðuneytis Bandaríkjanna, hefur ákært Trump í tveimur málum. Annað þeirra snýr einnig að viðleitni hans til að snúa úrslitum forsetakosninganna í Bandaríkjunum árið 2020, nema á landsvísu. Hitt snýr að opinberum gögnum og leynilegum skjölum sem hann tók með sér úr Hvíta húsinu þegar hann flutti til Flórída og neitaði að afhenta.

Þá hefur hann einnig verið ákærður í New York fyrir brot á lögum um kosningar vegna þagnargreiðslu til klámmyndaleikkonunnar Stormy Daniels.

Ekki er búið að ákveða hvenær réttarhöldin í Georgíu eiga að hefjast en búið er að ákveða að sýnt verði frá þeim í beinni útsendingu. Réttarhöldin í kosningamáli Smith eiga að hefjast þann 4. mars á næsta ári. Réttarhöldin í málinu sem snýr að greiðslunni til Daniels eiga svo að hefjast þann 25. mars.

Réttarhöldin í málinu um skjölin eiga að hefjast í maí.