Icelandair segir upp 87 flugmönnum og gerir kjarasamning við þá sem eftir eru

Icelandair hefur undirritað framlengingu á kjarasamningi við Félag íslenskra atvinnuflugmanna (FÍA) sem gildir til 30. september 2020. Þá hefur verið ákveðið að horfa frá áformum um að færa 111 flugmenn í 50% starf og segja þess í stað upp 87 flugmönnum. Þetta er gert til að bregðast við kyrrsetningu Boeing 737 Max-flugvéla félagsins, að því er fram kemur í tilkynningu frá Icelandair.

Fyrri kjarasamningur FÍA og Icelandair hefði að öllu óbreyttu runnið út um næstu áramót. Nýi kjarasamningurinn kveður á um að samningsbundin launahækkun, sem taka átti gildi 1. október nk., frestast til  1. apríl 2020 og engar aðrar launahækkanir munu eiga sér stað á tímabilinu.

Þá var jafnframt undirrituð viljayfirlýsing sömu aðila um að skipa starfshóp til að útfæra ýmis atriði sem snúa að starfsfyrirkomulagi flugmanna. Í tilkynningu segir að verkefni starfshópsins miði að því að styrkja samkeppnishæfni Icelandair. Kjarasamningurinn fer nú í atkvæðagreiðslu hjá félagsmönnum FÍA.

Vonast til að flestir eigi afturkvæmt næsta vor

Í lok síðasta mánaðar tilkynnti Icelandair að gera þyrfti ráðstafanir innan félagsins til að bregðast við kyrrsetningu Boeing 737 Max-flugvéla, sem ekki er gert ráð fyrir að teknar verði aftur í rekstur fyrr en á nýju ári.

Í tilkynningu er þessi „fordæmalausa staða“, sem hafði neikvæð áhrif á reksturinn, sögð hafa orðið til þess að endurskoða þurfti fjölda áhafnarmeðlima flugfélagsins með hliðsjón af endurskoðaðri flugáætlun. Þannig verður 87 flugmönnum sagt upp störfum 1. október næstkomandi.

„Um síðustu mánaðamót voru því gerðar tímabundnar breytingar hjá hópi flugmanna og flugstjóra, frá 1. desember 2019 til 1. apríl 2020, þar sem m.a. 111 flugmenn voru færðir niður í 50% starf. Ákveðið hefur verið að draga þessa ráðstöfun til baka en segja þess í stað upp hluta af flugmönnum félagsins. Uppsögnin tekur gildi 1. október nk. og nær til 87 flugmanna. Icelandair vonast til þess að geta boðið flestum þeirra starf aftur næsta vor. Hjá félaginu starfa áfram um 460 flugmenn og flugstjórar,“ segir í tilkynningu Icelandair.

Haft er eftir Boga Nils Bogasyni forstjóra Icelandair í tilkynningu að mikilvægt sé á þessum tímapunkti að ganga frá samningum við FÍA. Bæði FÍA og Icelandair átti sig á því að leita þurfi sameiginlegra lausna sem þjóna hagsmunum beggja aðila.

„Flugmenn sýna það í verki með því að fresta samningsbundnum launahækkunum. Við höfum á liðnum árum átt gott samstarf við FÍA um úrlausnir ýmissa mála er snúa að kjaramálum flugmanna og samkeppnishæfni Icelandair og aðilar eru sammála um að leggja enn meiri áherslu á þá vinnu. Það er alltaf erfið ákvörðun að segja upp starfsfólki en í ljósi þeirrar fordæmalausu stöðu sem félagið er í vegna flotamála verðum við því miður að grípa til þessara aðgerða. Við vonumst til að geta boðið þessum flugmönnum starf aftur fyrir næsta sumar.“

Örnólfur Jónsson formaður FÍA vill ekki tjá sig um uppsagnirnar eða kjarasamninginn og efni hans fyrr en búið er að kynna samninginn félagsmönnum. Það verður gert á föstudag. Þar á eftir hefst atkvæðagreiðsla sem mun standa yfir í viku.

Fréttin hefur verið uppfærð.