Engar breytingar á lögum um þungunarrof í Noregi

Svo virðist að ekkert verði af mögulegum breytingum á lögum um þungunarrof í Noregi, líkt og verið hefur í umræðunni.

Samkomulag náðist um drög að stjórnarsáttmála nýrrar fjögurra flokka ríkisstjórnar í gær, en Kristilegi þjóðarflokkurinn (KrF) mun þar ganga formlega inn í stjórn Hægriflokks Ernu Solberg forsætisráðherra, Framfaraflokksins og Venstre. KrF hefur hingað til varið stjórnina vantrausti.

KrF hefur barist fyrir því að herða löggjöf um þungunarrof í landinu. Samkvæmt stjórnarsáttmálanum virðist flokkurinn hins vegar þurft að láta í minni pokann í því máli, en á móti náð fram einhverjum af öðrum helstu baráttumálum sínum. Fjölmennar samkomur voru í stærstu borgum Noregs í nóvember þar sem hugsanlegum breytingum á lögum um þungunarrof var mótmælt. 

Flokkarnir fjórir munu hver í sínu lagi taka afstöðu til nýs sáttmála ríkisstjórnar í dag.

Viðræður um nýjan stjórnarsáttmála hófust á öðrum degi þessa árs. Í frétt NRK  segir að í stjórnarsáttmálanum sé meðal annars kveðið á um lækkun vegtolla og breytingar á stefnu stjórnar í loftslagsmálum og bótakerfinu.