Tapið í Tékklandi hjálpar okkur

„Það var ekkert svo erfitt að velja þennan hóp. Við vorum viðbúnir meiðslum og höfum verið að fylgjast með um 35 leikmönnum og vorum búnir að forgangsraða ef einhverjir myndi meiðast og annað,“ segir Heimir Hallgrímsson, annar landsliðsþjálfara Íslands, en hann og Lars Lagerbäck tilkynntu í gær leikmannahópinn fyrir leikinn gegn Kasakstan sem fer fram ytra þann 28. mars næstkomandi.

Þremur dögum síðar mun þessi hópur síðan mæta Eistum í vináttulandsleik. Sölvi Geir Ottesen og Theodór Elmar Bjarnason gátu ekki gefið kost á sér vegna meiðsla og þeir Helgi Valur Daníelsson og Ólafur Ingi Skúlason voru ekki valdir að þessu sinni.

„Þeir eiga enn möguleika. Þetta var bara valið svona að þessu sinni. Það er bara mjög ánægjulegt að það sé barátta um sætin í hópnum,“ segir Heimir.

Framtíðarmenn eins og Haukur Heiðar Hauksson og Hörður Björgvin Magnússon eru í hópnum að þessu sinni og einnig kemur Guðlaugur Victor Pálsson inn í hópinn.

Nýta tapið á jákvæðan hátt

Ísland tapaði sínum síðasta leik í undankeppni EM gegn Tékkum og þjálfararnir hafa reynt að nýta það tap á jákvæðan hátt fyrir liðið.

„Ef við hefðum unnið í Tékklandi hefði ég haft áhyggjur af vanmati í Kasakstan. Ég held að tapið í Tékklandi muni að vissu leyti hjálpa okkur þó svo það sé aldrei gott að tapa,“ segir Heimir og bendir á að lið Kasakstan sé sýnd veiði en ekki gefin þó svo liðið sitji í neðsta sæti riðilsins með eitt stig eftir fjóra leiki. Ísland er í öðru sæti með níu stig.

„Þeir eru mjög erfiðir heim að sækja. Þeir eru bæði með létta, snögga og tekníska leikmenn og svo sterka stráka í vörninni. Þeir spila með þrjá miðverði og oft á tíðum eru fimm í vörninni hjá þeim. Liðum hefur reynst erfitt að brjóta þá niður eins og sást til að mynda í Hollandi þar sem Kasakstan komst yfir og Hollandi tókst ekki að skora fyrr en eftir um 70 mínútur.“

Tímabilið að byrja í Kasakstan

Landsliðsþjálfarinn vildi lítið gefa upp um veikleika andstæðingsins og hvernig Ísland ætli sér að sækja á þá. Hann sagði þó að ekki væri hægt að bjóða upp á neinar afsakanir ef illa færi.

„Allir leikmenn Kasakstan spila í heimalandinu og það hlýtur að teljast vera veikleiki hjá þeim að allt liðið er að byrja tímabilið sitt núna. Þeir gætu því verið ryðgaðir.“

Fyrir ekki svo löngu hefði íslenska landsliðið verið sátt við að fara til lands eins og Kasakstan og sækja eitt stig. Þeir tímar eru sem betur fer liðnir. Íslenska liðið ætlar sér þrjú stig og ekkert annað í Astana.

„Staðan í riðlinum býður ekki upp á annað. Við verðum að fara þarna út til þess að vinna leikinn þó svo það yrði enginn heimsendir ef við gerðum jafntefli. Við megum samt ekki tapa þessum leikjum ef við ætlum okkur annað sætið í riðlinum.“

Eiður til í að fórna sér

Eiður Smári Guðjohnsen var aftur valinn í hópinn og hann tekur slaginn þó svo eiginkona hans eigi von á þeirra fjórða barni á svipuðum tíma og leikurinn fer fram.

„Hann var mjög jákvæður á þetta verkefni þó svo þau hjónin eigi von á barni. Þetta er virðingarvert hjá honum og sýnir hvernig karakter hann er. Eiður er til í að fórna sér fyrir land og þjóð,“ segir Heimir og bætir við að það hafi ekki þurft að setja neina pressu á Eið Smára til að vera með. „Það er frábært að hann sé til í að hjálpa okkur.“

Eins og gengur er mismunandi stand á leikmönnum íslenska liðsins. Sumir eru að spila á meðan aðrir fá ekki mörg tækifæri. Tímabilið hjá öðrum leikmönnum er svo kannski ekki hafið.

„Vissulega hefur staðan oft verið betri. Við höfum átt markahæstu menn í Noregi og Hollandi er við spilum landsleik. Allir á flugi, en þetta er sá tími ársins þar sem allir eru ekki komnir í gang. Þetta er eðlilegt.“