Omar Sowe kominn í KR-treyjuna

Omar, sem er 26 ára gamall, skrifaði undir samning til þriggja ára við KR.

Lengi hefur legið í loftinu að hann væri á leiðinni í Vesturbæinn en fréttir bárust af því fyrir rúmum mánuði að Omar hefði náð samkomulagi við KR-inga. Honum var þá heimilt að ræða við önnur félög en ÍBV þar sem samningur hans var að renna út.

Omar, sem er uppalinn hjá New York Red Bulls í Bandaríkjunum, kom fyrst til Íslands árið 2022 og hefur samtals skorað 52 mörk í 109 leikjum hér á landi.

Omar skoraði sex mörk í sextán leikjum í Bestu deildinni fyrir ÍBV í sumar eftir að hafa verið frá keppni í rúmt ár vegna hnémeiðsla.

KR-ingar eru þegar farnir að styrkja sitt lið fyrir næstu leiktíð og tilkynntu í byrjun mánaðarins að þeir hefðu samið við Óðin Bjarkason til þriggja ára. Hann er uppalinn hjá KR en kom heim til félagsins eftir góða frammistöðu með Aftureldingu í sumar þar sem hann skoraði 14 mörk.

Þá kom hinn 17 ára gamli Mattías Kjeld, sem uppalinn er hjá Val, til KR eftir að hafa skorað tíu mörk í Lengjudeildinni með Gróttu í sumar.