Sjáðu ræðu Óskars fyrir markaveislu KR-liðsins

KR-ingar höfðu samt að litlu að keppa í leiknum enda þegar búnir að tryggja sér annað sætið í deildinni. Liðið setti engu að síður á svið markasýningu og hjálpaði fyrirliða sínum Aroni Sigurðarsyni að slá markametið með sínu 21. og 22. marki í Bestu deildinni. KR endaði með því að skora 93 mörk í 27 leikjum eða 3,4 mörk að meðaltali í leik.

Óskar Hrafn Þorvaldsson, þjálfari KR, fór með liðið úr fallbaráttu í titilbaráttu á einu ári og ef marka má viðtölin við hann eftir lokaleikinn þá á ekkert að stíga af bensíngjöfinni í Vesturbænum. Það mátti líka heyra á ræðu hans inni í búningsklefa fyrir leikinn á móti Blikum.

KR-ingar leyfðu fylgjendum samfélagsmiðla sinna að vera fluga á vegg inni í klefa og sýndu þessa ræðu þjálfara síns sem má hlusta á hér fyrir neðan.

„Við erum það sem við erum í dag. Sýnum úr hverju við erum gerðir. Sýnum að þó að það sé þannig lagað ekkert upp á að spila. Ekki sæti, ekki neitt, nema bara stoltið, virðingin og vitneskjan um það að við erum að fara halda áfram,“ sagði Óskar Hrafn í ræðu sinni.

„Við erum ekki hættir og við erum ekki saddir. Við ætlum ekki að leggjast á meltuna, hafa það ógeðslega gott í vetur og koma svo eins og einhverjir sem eru búnir að meika það,“ sagði Óskar

„Hver einasti leikur og hver einasta f-g mínúta sem við eyðum saman verður að vera vel nýtt. Akkúrat núna byrjar næsta tímabil. Núna. Það byrjar í dag, eins fáránlega og það hljómar þá gerir það það,“ sagði Óskar

„Við erum að byggja á hverjum einasta degi og við höfum ekki efni á því að sóa einum einasta degi,“ sagði Óskar Hrafn en það má sjá ræðuna hans hér fyrir neðan.