Styttan af Dwyane Wade fékk nýjan haus

Wade greindi frá því á föstudag að hann hefði samþykkt að nýtt höfuð yrði gert á styttuna sem afhjúpuð var honum til heiðurs fyrir utan höllina fyrir tveimur árum, enda hafði gagnrýnin dunið á henni nánast frá því að hún var afhjúpuð.

Upprunalega styttan var harðlega gagnrýnd víða þar sem andlitið líktist Wade nánast ekki neitt. Waden lék stærstan hluta ferils síns sem stjarna Miami Heat og átti stóran þátt í öllum þremur NBA-meistaratitlum félagsins.

„Ég þurfti að spyrja sjálfan mig frekar einfaldrar spurningar: „Ef fólk finnur ekki fyrir þessari tengingu þegar það horfir á andlitið, hvers vegna ættum við ekki að reyna að bæta það?“ skrifaði Wade í pistli sem birtist á föstudag. „Þannig að við hlustuðum, áttum hreinskilin samtöl við alla sem áttu hlut að máli og vorum öll sammála um að gera breytingar á höfðinu,“ skrifaði Wade.

Vinnunni við styttuna lauk á síðustu dögum en krossviðarkassi var settur yfir hana svo almenningur sæi ekki hvað fór fram. Heat birti myndir af nýju og endurbættu styttunni í dag skömmu áður en pistill Wades var gerður opinber.

„Þetta snýst ekki um að þurrka út þá vinnu sem þegar hafði verið unnin eða sýna listamönnunum sem lögðu tíma sinn og hæfileika í að skapa hana vanvirðingu. Þetta snýst um að vera tilbúinn að hlusta,“ skrifaði Wade og bætti við. „Þetta snýst um að átta sig á því þegar eitthvað hefur merkingu fyrir fleiri en mann sjálfan og vera nógu opinn til að endurskoða það.“