Hætti við Lakers sökum hroka Kobe

Garnett yfirgaf Minnesota Timberwolves árið 2007 en hafði þá verið leikmaður liðsins allan sinn áratug í NBA-deildinni. Hann vildi prófa eitthvað nýtt og keppa um titla.

Hann valdi frekar að fara til Boston til að spila með Ray Allen og Paul Pierce heldur en að fara til Los Angeles Lakers og vera hluti af liði Kobe Bryant þar á bæ.

„Ég hafði spilað með Paul (Pierce) áður og ég hafði spilað með Ray (Allen), en ekki opinberlega. Ray er frá Suður-Karólínu, þannig að ég þekkti hann. Þannig að mér líkaði það,“ segir Garnett.

„Mér leist betur á hugmyndina en hina kostina sem ég hafði. Ég held að ég hafi átt möguleika hjá Phoenix (Suns). Ég átti möguleika hjá (Los Angeles) Lakers. En ég náði ekki í Kobe í síma. Hann var alveg rosalega hrokafullur. Þannig að ég hugsaði bara: ‚Veistu hvað? Ég ætla bara að [fara til] þeirra.‘ Og þannig endaði ég í Boston. Það var fullkomið.“

Garnett vann sinn eina NBA-meistaratitil á fyrsta ári sínu með þeim grænklæddu. Celtic urðu meistarar eftir sigur á Lakers í úrslitaeinvíginu um titilinn.

Lakers urðu svo meistarar árið eftir, vorið 2009, og vörðu titilinn árið 2010 þar sem liðið náði hefndum með sigri á Celtics í úrslitum.