Of fáir hermenn og engin tengsl

Tveir af helstu ráðamönnum Bandaríkjanna sem komu að innrásinni í Írak hafa neyðst til að draga til baka orð sem þeir létu falla á opinberum vettvangi. Donald Rumsfeld sagðist engar sannanir hafa séð um tengsl Saddam Hussein og Osama bin Laden og Paul Bremer sagði það hafa komið í bakið á Bandaríkjunum að hafa sent of fámennt herlið til Íraks. Eftir því sem ég best veit hef ég aldrei séð óumdeilanleg sönnunargögn fyrir því að tengsl hafi verið milli þeirra tveggja," sagði Donald Rumsfeld varnarmálaráðherra þegar hann var spurður um tengsl milli Saddams Hussein og Osama bin Laden. Orð sín lét Rumsfeld falla á fundi Council on Foreign Relations í New York. Þar sagði hann jafnframt að síðasta árið hefði hann séð svarið við spurningunni um tengsl Saddams og bin Laden velkjast milli leyniþjónustustofnana með ótrúlegum hætti. Þessi orð hans stangast á við það sem Bandaríkjastjórn hefur áður sagt um tengsl mannanna. Nokkrum klukkustundum síðar sendi Rumsfeld frá sér tilkynningu þar sem hann sagði að ræða sín hefði misskilist. Hann sagði að tengsl hefðu verið milli Saddams og al-Kaída og sannanir fyrir veru al-Kaída liða í Írak í valdatíð Saddams Hussein. Bandaríkin guldu það dýru verði að hafa ekki nægilega fjölmennt herlið í Írak eftir að Saddam Hussein var hrakinn frá völdum, sagði Paul Bremer, fyrrum yfirmaður hernámsstjórnar Bandaríkjanna í Írak. Hann sagði Bandaríkin hafa gert tvenn afdrifarík mistök í Írak, annars vegar að hafa aldrei verið með nægilega fjölmennt herlið, hins vegar að stöðva ekki óöldina sem þá blossaði upp við fall stjórnar Saddams Hussein. Eftir að fréttir af ræðu Bremers, á fundi tryggingafélags, bárust út sendi hann yfirlýsingu frá sér þar sem hann sagðist telja að bandaríska herliðið í Írak væri nógu fjölmennt nú og að hann styddi heilshugar stefnu forsetans, George W. Bush.