Opna þriðju verslunina í Kaup­manna­höfn

Í fréttatilkynningu þess efnis segir að Storm þekki margir Íslendingar en hún hafi skapað sér sess sem ein helsta tísku- og lífstílsverslun Kaupmannahafnar síðustu áratugi. Verslunin sé alls 160 fm að stærð og á tveimur hæðum.

„Þegar Rasmus Storm, eigandi Storm, ákvað að láta staðar numið með verslunina eftir 32 ár í rekstri vildi hann finna réttan aðila sem gæti haldið uppi merkjum þessa skemmtilega verslunarhúsnæðis. Samtal hófst á milli okkar og úr varð að 66°Norður tók við húsnæðinu en það varð líka til gott vinasamband á milli okkar og unnin var lítil samstarfslína sem seld verður í versluninni sem Rasmus hannaði á Íslandi með hönnunarteyminu okkar,“ er haft eftir Helga Rúnari Óskarssyni, forstjóra 66°Norður.

Verslunin sæki innblástur til Íslands en þar megi til dæmis finna vegg úr hraunhellum, íslenskt berg og mátunarklefarnir á neðri hæðinni séu bein skírskotun í jökla og jöklahella. Verslunarrýmið sé málað með málningu frá íslenska fyrirtækinu Dýpi, sem vinni málningu úr kalkþörungum úr Arnarfirði á Vestfjörðum. 

Versluninni hafi verið fagnað með ýmsum hætti í dag en dagurinn hafi byrjað á hlaupi frá versluninni í samstarfi við hlaupamerkið Hoka. Fjölmiðlum hafi svo verið boðið í opið hús og morgunmat og loks verði götupartý fram á kvöld.

Nýja verslunin í Store Regnegade sé þriðja verslun 66°Norður í Kaupmannahöfn en íslenska útivistarmerkið sé fyrir með verslanir í Fredriksberg og á Kastrup-flugvelli.