Tví­tugur strákur fær næstum því tólf milljarða króna samning

Hinn ungi Celebrini, sem spilar með San Jose Sharks, skrifaði undir stærsta NHL-samning sögunnar sem skilar honum 94 milljónum dollara á fimm árum en það gera næstum því tólf milljarða í íslenskum krónum.

Félagið staðfesti samningsframlenginguna í gær. Þar kemur fram að Celebrini muni þéna 18,8 milljónir dollara á ári frá 2027 til 2032 eða meira en 2,3 milljarða króna á hverju ári. Aldrei áður hefur jafn stór samningur verið undirritaður í NHL-deildinni.

Nýr samningur Celebrinis tekur reyndar ekki gildi fyrr en næsta haust, svo hann þarf að bíða í eitt ár eftir að verða methafinn.

„Ég gæti ekki verið ánægðari með að skrifa undir samninginn minn í dag. Trúin sem stjórn liðsins sýnir mér er sönnun þess að við erum að byggja upp eitthvað sérstakt. Ég og liðsfélagar mínir erum tilbúnir að færa borginni Stanley-bikarinn,“ segir Celebrini.

Celebrini, sem er fæddur árið 2006, var valinn fyrstur í nýliðavali NHL árið 2024. Síðan þá hefur hann orðið einn af bestu leikmönnum deildarinnar og fékk það afar virta verkefni að vera fyrirliði Kanada á HM í maí.

Nítján ára gamall varð hann þar með næstyngsti fyrirliði landsliðsins í sögunni, en liðið tapaði síðar leiknum um bronsverðlaunin á HM gegn Noregi.