Skjálfti að stærð 7,1 skók Japan

Kyushu er þriðja stærsta eyja Japans og búa þar yfir tólf milljónir manna.  Kjarnorkueftirlit Japans sagði að engin frávik hefðu fundist í þremur nálægum kjarnorkuverum vegna skjálftans. Skjálftinn fannst seint síðdegis að staðartíma.

Almannavarnayfirvöld segja engar tilkynningar hafa borist um skemmdir á mikilvægum opinberum mannvirkjum og innviðum á svæðinu en yfirvöld væru enn að meta umfang tjónsins af völdum skjálftans. AP-fréttaveitan greinir frá. 

Ekki enn séð flóðbylgju

Íbúar voru varaðir við áframhaldandi skjálftavirkni og þeir hvattir til að vera sérstaklega á varðbergi næstu tvo til þrjá daga vegna möguleika á öðrum stórum skjálfta.

Shinji Kiyomoto hjá japönsku veðurstofunni sagði á blaðamannafundi að engin flóðbylgja hefði enn sést á landi vegna skjálftans og að stofnunin hygðist aflétta flóðbylgjuviðvöruninni tiltölulega fljótlega.

Lestarferðir hafa verið stöðvaðar tímabundið á meðan öryggisskoðanir fara fram. Flugbrautinni á Aso Kumamoto-flugvellinum var lokað í kjölfar jarðskjálftans og er óljóst hvenær hún verður opnuð aftur.

Fólk eigi að forðast strandlengjuna

Sanae Takaichi, forsætisráðherra Japans, hvatti íbúa til að forðast strandlengjuna en í fyrstu var gert ráð fyrir flóðbylgju sem gæti náð eins metra hæð.

Hún sagði að ríkisstjórnin hefði sett á fót verkefnahóp til að safna upplýsingum, meta hugsanlegar skemmdir og undirbúa björgunaraðgerðir ef þörf krefur.

„Við setjum líf fólks í forgang,“ sagði Takaichi og hvatti íbúa á þeim svæðum þar sem skjálftinn fannst vel til að sýna aðgát vegna hugsanlegra sterkra eftirskjálfta.

Kumamoto varð fyrir mannskæðum jarðskjálfta árið 2016 þar sem yfir 50 fórust, 1.800 slösuðust og tugþúsundir heimila skemmdust eða eyðilögðust.

Fréttin hefur verið uppfærð.