Kominn úr ánni

Bíllinn er í eigu Steypustöðvarinnar samkvæmt upplýsingum frá fyrirtækinu. Ökumaður bílsins var fluttur á Landspítala með þyrlu Landhelgisgæslunnar í gær vegna ofkælingar. Hann hafði komið sér upp á steypubílinn sem lá á hlið ofan í Þjórsá þegar viðbragðsaðilar komu á staðinn. Landsvirkjun greip til ráðstafana eftir að tilkynning barst um atvikið í gær.

„Við minnkuðum rennslið frá Sultartangalóni til að auðvelda þeim að athafna sig á meðan þeir voru að ná honum upp úr sem gekk svo greiðlega. Þeir gátu farið með gröfu þarna út í kranabíl og dregið hann upp á bakka,“ segir Ragnhildur Sverrisdóttir hjá Landsvirkjun. Aðgerðin hafi tekið innan við klukkutíma og steypubíllinn verið kominn á land klukkan 15 í dag. „Þannig að þetta hefur gengið mjög vel.“

Vegagerðin lokaði fyrir umferð um brúnna þar sem bíllinn fór út af í gærkvöldi vegna skemmda á brúarhandriði. Gert er ráð fyrir að viðgerð taki nokkra daga og leiðin verði lokuð eitthvað fram í vikuna. Hjáleið er um Landveg (26) til að komast í Landmannalaugar eða á Sprengisandsleið.

Fréttin er í vinnslu.