Ölgerðin hækkar verðin

Agnar Már Másson skrifar 5. júní 2026 19:54

Ölgerðin hefur tilkynnt viðskiptavinum að hún ætli að hækka verð á framleiðsluvörum sínum. Vörur í dós hækka um 2,1 prósent í verði, að undanskildum Collab sem hækkar um 1,1 prósent. Vörur í plasti hækka einnig um 1,1 prósent en aðrar framleiðsluvörur um 0,8 prósent.

„Ástæðan eru hækkanir á olíu- og álverði á heimsmarkaði sem hafa áhrif á okkar framleiðslukostnað,“ segir í tilkynningu sem Ölgerðin sendi viðskiptavinum sínum í kvöld, föstudag.

Þar greinir Ölgerðin frá verðhækkun á framleiðsluvörum fyrirtækisins sem á að taka gildi þann 6. júlí 2026 sem hér segir.

Dósir eigi að hækka um 2,1 prósent að undanskildum Collab sem hækki aðeins um 1,1 prósent í verði. Vörur í plasti hækki sömuleiðis um 1,1 prósent og önnur framleiðsluvara um 0,8 prósent.

„Sem fyrr gerir Ölgerðin allt sem í valdi fyrirtækisins er til að halda aftur af verðhækkunum. Bæði með aðhaldi í rekstri og umfangsmiklum viðræðum við erlenda birgja,“ segir enn fremur í tilkynningu Ölgerðarinnar til viðskiptavina.

Olíuverð hefur hækkað verulega í tengslum við stríðið í Íran þar sem Hormússund, ein stærsta olíuflutningaleið heims, hefur verið lokað að mestu í þrjá mánuði. Þannig kann að vera dýrara að framleiða mál utan um drykki, svo sem áldósir eða plastflöskur en til þess þarf olíu.

Ölgerðin Neytendur Gosdrykkir Áfengi Árásir Bandaríkjanna og Ísraels á Íran