„Það er al­gjör geð­bilun að spila í þessum hita“

Hitabylgja hefur sett svip sinn á lönd Evrópu síðustu daga og í París er óvenju heitt miðað við árstíma. Þrátt fyrir erfiðar aðstæður náði Mensik samt að vinna leikinn.

Hann var greinilega kominn með krampa í fæturna áður en hann gaf síðustu uppgjöf leiksins en smellhitti boltann og fagnaði sigri gegn Mariano Navone. Leikurinn entist í fjóra klukkutíma og 41 mínútu. Lokatölur 6-3, 2-6, 6-4, 1-6, 7-6 (13-11).

Eftir leikinn var Mensik algjörlega örmagna. Hann féll í yfirlið og lá á vellinum í nokkrar mínútur meðan læknateymi hlúði að honum.

Eftir að hafa fengið handklæði um hausinn og íspakka á háls og bringu gat Mensik staðið upp. Hann reyndi þá að labba inn í búningsklefa en virtist aftur falla í yfirlið og var rúllað inn í hjólastól.

„Líkaminn slökkti bara á sér,“ sagði Mensik við Sky Sports.

„Það er algjör geðbilun að spila í þessum hita og sérstaklega þegar sólin er hæst á lofti. Að vera þarna úti í meira en fjóra og hálfan klukkutíma, það er bara algjör bilun.

Meira að segja með pásunum, við fáum svo lítinn tíma. Þú færð bara eina mínútu og þegar þú ert sestur eru svona þrjátíu sekúndur eftir af pásunni. Það er ekki mikið sem þú getur gert til að kæla þig niður á þeim tíma,“ sagði Mensik en honum var einmitt tvisvar refsað fyrir að taka sér of langt hlé.

„Dómarinn í dag, og það sem gerðist síðan eftir leik. Það er kannski best að ég haldi mínum skoðunum fyrir sjálfan mig en svona framkomu á ég erfitt með að virða.“

Mensik er í 26. sæti heimslistans og er síðasti maðurinn sem vann Jannik Sinner, í Doha í febrúar, en efsti maður heimslistans hefur ekki tapað leik síðan.

Tékkinn vonast nú til að jafna sig af hitaslaginu í tæka tíð fyrir leik sinn í þriðju umferð gegn Alex De Minaur á morgun.