Sjö hand­teknir í Noregi grunaðir um að hag­ræða úr­slitum

Verdens Gang í Noregi greinir frá og lögreglustjórinn í Oslo staðfesti tíðindin.

Samhliða handtökunum fóru fram húsleitir og gögn voru gerð upptæk til frekari rannsókna.

Heimildir VG herma að þeir sem liggja undir grun um hagræðingu úrslita séu aðilar með tengsli við norsku úrvalsdeildina. Þeirra á meðal séu leikmenn. 

VG hefur komist í samband við lögfræðinga tveggja annarra sem eru ásakaðir um að hagræða úrslitum en voru ekki handteknir á miðvikudag.

Lögreglan í Oslo framkvæmdi handtökurnar sjö og segir málið í forgangi hjá sér en rannsókn þess enn á frumstigi.

VG hefur reynt að hafa samband við Lise Klaveness, forseta norska knattspyrnusambandsins, án árangurs.

Svipað mál kom upp í norska boltanum fyrir fjórtán árum síðan en þá voru sjö menn handteknir fyrir að hagræða úrslitum í leikjum hjá liðunum Follo og Asker. Fjórir þeirra hlutu fangelsisdóm en hinir þrír voru sýknaðir.