Fyrsta íshokkígull Banda­ríkjanna frá Krafta­verkinu 1980

Bandaríkjamenn unnu frækinn sigur á ógnarsterku liði Sovétmanna í úrslitaleik Vetrarólympíuleikanna 1980.

Frá Kraftaverkinu á ísnum, eins og afrek Bandaríkjanna í Lake Placid 1980 er oft kallað, hefur bandaríska liðið ekki unnið gullið í íshokkí á Vetrarólympíuleikum. En Bandaríkjamenn fengu tækifæri til þess að bæta úr því þegar þeir mættu Kanadamönnum í úrslitaleiknum á lokadegi leikanna í Mílanó og Cortina.

Jack Hughes var hetja Bandaríkjanna en hann skoraði sigurmark þeirra í framlengingu, 2-1.

Markvörður bandaríska liðsins, Connor Hellebuyck, hafði nóg að gera í dag og átti stórleik. Mikið mæddi á honum eftir að Matt Boldy kom Bandaríkjunum yfir. Kanada sótti stíft og Cale Maker fann leiðina framhjá Hellebyuck á 38. mínútu.

Hann hélt áfram að verja og úrslit leiksins réðust í framlengingu. Þar reyndist Hughes örlagavaldurinn en hann skoraði sigurmark Bandaríkjanna þegar rúm mínúta var liðin af framlengingunni.

Þetta voru tólftu gullverðlaun Bandaríkjanna á Vetrarólympíuleikunum í Mílanó og Cortina en aðeins Noregur vann fleiri (18).

Bandaríkin hafa nú þrisvar sinnum orðið Ólympíumeistarar í íshokkí karla en fyrri tveir titlarnir unnust á bandarískri grundu.