Greiða tryggðar pakka­ferðir úr Ferða­trygginga­sjóði eftir ára­mót

Greint var frá því í gær að leyfi ferðaþjónustufyrirtækisins Eagle golfferða hefði verið fellt úr gildi og því gæti fólk, sem greiddi fyrir ferð á þeirra vegum en komst ekki í hana, sótt um í Ferðatryggingasjóð. Fjöldi fólks átti pantaða ferð með félaginu en komst ekki í hana í kjölfar gjaldþrots Play í lok septembermánaðar.

Í dag var tilkynnt um að ferðaskrifstofuleyfi Tango Travel ehf. hefði einnig verið fellt úr gildi, og því gæti fólk sótt um að fá endurgreiðslu hjá Ferðatryggingasjóði, fyrir ferðir frá þeim sem ekki voru farnar en búið var að greiða fyrir.

Tilkynnt var um það í nóvember að Tango Travel hefði ákveðið að hætta starfsemi í núverandi mynd sökum þungra áhrifa sem skrifstofan varð fyrir vegna gjaldþrots Play.

Fram kom í tilkynningu frá Ferðamálastofu í gær að Ferðatryggingasjóður endurgreiði ferðamanni þær greiðslur sem hann hefur innt af hendi vegna pakkaferðar eða samtengdrar ferðatilhögunar sem ekki er framkvæmd í samræmi við samning vegna ógjaldfærni ferðaskrifstofu.

Frestur til að senda kröfu í Ferðatryggingasjóð er til og með 9. febrúar 2026. Í tilkynningu kom fram að krafa þurfi að berast innan kröfulýsingarfrests og að kröfur sem berist eftir þann tíma verði ekki teknar til greina. Helena segir starfsmenn ekki gera sér grein fyrir þeim fjölda sem eigi eftir að senda inn kröfu og hversu miklar fjárhæðir sé að ræða. Ferðatryggingasjóður ætti þó að eiga fyrir þeim.

„Við vitum það í rauninni ekki fyrr en kröfufresti lýkur,“ segir Helena og að allir sem eigi lögmætar kröfur fái þær að fullu greiddar.

Eiga inni milljón

Hvert tilfelli og krafa verði metin og hvort hún falli undir skilyrði laganna, en endurgreiðslan er bundin við pakkaferðir.

„Þeir sem fá samþykkta kröfu fá hana endurgreidda að fullu. Þetta fer eftir umfangi og fjölda hvað þetta tekur langan tíma,“ segir hún og að það fari einnig eftir gögnunum sem fólk sendir og hvort þau séu fullnægjandi.

Fjallað var um það í síðustu viku að par sem ætlaði í golfferð til Tyrklands með Eagle golfferðum ætti inni um milljón hjá fyrirtækinu.

Geta stofnað nýtt fyrirtæki 

Hún segir að þegar búið er að fella niður leyfi fyrirtækis sé ekki hægt að fá leyfið aftur nema með því að greiða aftur það sem Ferðatryggingasjóður hafi greitt út. Það sé ekkert sem banni þessum rekstraraðilum að stofna nýtt fyrirtæki, á nýrri kennitölu, og selja sams konar ferðir.

„Ef öll skilyrði eru uppfyllt er ekkert sem bannar það.“