Stýrir vöru­merkja- og markaðs­málum hjá Ís­lands­hótelum

Þetta kemur fram í tilkynningu. Þar segir að Katrín Erna muni bera ábyrgð á vörumerkja- og markaðsmálum félagsins með áherslu á þróun markaðsstarfs, styrkingu vörumerkja og samræmda upplifun viðskiptavina.

„Katrín Erna hefur víðtæka reynslu af stefnumótun, samskiptum, markaðsmálum og verkefnastjórnun innan ferðaþjónustunnar. Hún starfaði um árabil hjá Icelandair og leiddi þar fjölbreytt verkefni á sviði stafrænnar þróunar, vörumerkja- og markaðsmála. Hún vann jafnframt náið með stjórnendum að miðlun stefnu og samskiptum við innri og ytri hagaðila. Á starfsferli sínum hefur hún stýrt umfangsmiklum verkefnum þvert á starfssvið með áherslu á vöxt, breytingar og nýsköpun. Katrín Erna er með meistaragráðu í markaðsfræði frá Háskólanum í Reykjavík og er að ljúka meistaragráðu í samskiptastjórnun frá Háskólanum á Bifröst.

Samhliða ráðningu Katrínar Ernu hafa Þórhallur Ólafsson og Auður Marteinsdóttir tekið við aukinni ábyrgð á sölu- og markaðssviði Íslandshótela. Þórhallur hefur tekið við sem forstöðumaður tekna og dreifileiða og Auður sem forstöðumaður söludeildar. Með breytingunum er verið að laga skipulag sölu- og markaðssviðs að auknu umfangi starfseminnar, skýra ábyrgð og styrkja samstarf milli deilda.

Þórhallur hefur langa reynslu af hótelrekstri og tekjustýringu. Hann var hótelstjóri á Fosshóteli Rauðará á árunum 2004–2006 og á Hótel Reykjavík Centrum frá 2006 til 2016. Síðastliðinn áratug hefur hann gegnt starfi tekjustjóra hjá Íslandshótelum. Í nýju hlutverki ber hann ábyrgð á tekjustýringu, dreifileiðum og hópabókunum félagsins. Þórhallur hefur lokið bókhaldsnámi við ÍTV, tölvutækninámi við TTÍ og leiðtoganámi fyrir stjórnendur í ferðaþjónustu við Opna háskólann í Reykjavík.

Auður hefur starfað hjá Íslandshótelum frá árinu 2016, fyrst sem viðskiptastjóri á sviði funda, hvataferða og ráðstefna (MICE) og sem sölustjóri á sama sviði frá 2021. Áður starfaði hún hjá ferðaskrifstofunni Atlantik við skipulag hvataferða og ráðstefna á Íslandi. Hún hefur því víðtæka reynslu af bæði sölu og skipulagningu slíkra ferða. Í nýju hlutverki stýrir Auður söludeild félagsins sem annast sölu til ferðaskrifstofa og fyrirtækja, auk funda, hvataferða og ráðstefna. Hún er með BS-gráðu í ferðamálafræði frá Háskóla Íslands.“

Íslandshótel rekur nítján hótel með um 2.400 herbergjum víða um land undir vörumerkjunum Fosshótel og Hótel Reykjavík, auk Hilton Reykjavík.