Tveir á­horf­endur létust á mis­munandi tímum á sama leik­vangi

Áhorfendurnir tveir voru 70 og 78 ára gamlir og dauðsföllin áttu sér stað á mismunandi tímum í leikvanginum í ítölsku borginni. Þeir létust báðir eftir hjartastopp.

Dauðsföllin voru staðfest af ATP og ítalska tennis- og padelsambandinu (FITP), að sögn breska ríkisútvarpsins. Sky Sports segir frá.

„FITP og ATP votta sína dýpstu samúð vegna hins hörmulega fráfalls tveggja áhorfenda á ATP-úrslitakeppninni í Tórínó í gær,“ segir í sameiginlegri yfirlýsingu.

Þar kemur einnig fram að sjúkralið hafi brugðist skjótt við og veitt alla mögulega aðstoð.

„Þrátt fyrir skjót viðbrögð og flutning á sjúkrahús í kjölfarið létust því miður báðir,“ segir enn fremur.

Fyrsta einliðaleik mánudagsins milli Lorenzo Musetti og Taylor Fritz seinkaði vegna tilkynningar um neyðartilvik meðal áhorfenda. Nokkur þúsund ítalskir aðdáendur höfðu mætt til að styðja Musetti og ríkjandi meistara Jannik Sinner.

ATP-úrslitakeppnin stendur yfir til næstkomandi sunnudags.

Sinner hóf titilvörnina vel

Jannik Sinner hóf titilvörn sína á ATP-úrslitakeppninni með því að sigra Felix Auger-Aliassime, sem glímdi við meiðsli, fyrir framan ástríðufullan áhorfendaskara í Tórínó.

Ítalinn Sinner, sem er annar í styrkleikaröð mótsins, var óaðfinnanlegur í uppgjöfum sínum í 7-5, 6-1 sigri á Kanadamanninum.

Sigurinn kemur Sinner í efsta sæti Björn Borg-riðilsins þar sem hann reynir að tryggja sér efsta sæti heimslistans í lok árs.

Keppa líka um efsta sæti heimslistans

Hann og keppinautur hans Alcaraz keppa um efsta sæti heimslistans í lok árs í Tórínó. Sinner verður að verja titil sinn – og vona að Alcaraz tapi leik í riðlakeppninni og komist ekki í úrslitaleikinn – til að halda efsta sætinu.

Alcaraz, sem er í hinum riðlinum á móti Sinner, hóf keppni sína með sigri í tveimur settum gegn Alex de Minaur á sunnudag.

Fyrr í gær brilleraði Taylor Fritz í uppgjöfum sínum og sigraði heimamanninn Lorenzo Musetti 6-3, 6-4 í Jimmy Connors-riðlinum.