Högnuðust um tæpa sjö milljarða

Í tilkynningu bankans til Kauphallar segir að hreinar vaxtatekjur hafi numið 13,3 milljörðum króna á ársfjórðunginum, og hafi hækkað um 1.483 milljónir króna frá sama ársfjórðungi í fyrra.

Kostnaðarhlutfall bankans hafi verið 38,2 prósent á þriðja ársfjórðungi, en þar séu undanskildar 550 milljónir króna innan vaxtaliðar sem varúðarfærslu vegna dómsmála.

Útlán til viðskiptavina hafi aukist um tvo milljarða króna á þriðja ársfjórðungi 2025 frá öðrum ársfjórðungi 2025, og hafi verið 1.333 milljarðar króna í lok ársfjórðungsins.

Eigið fé hafi numið 227 milljörðum króna, samanborið við 227,4 milljarða í lok árs 2024.

Reksturinn með ágætum

Jón Guðni Ómarsson, bankastjóri Íslandsbanka, segir að rekstur bankans á þriðja ársfjórðungi hafi verið með ágætum og rekja megi sterka afkomu bankans til góðs árangurs þvert á viðskiptaeiningar.

„Hagnaður af rekstri bankans nam 6,9 milljörðum króna sem er yfir spám greinenda fyrir fjórðunginn. Vaxtamunur var 3,1% á fjórðungnum. Arðsemi eigin fjár á fjórðungnum var 12,2% á ársgrundvelli og kostnaðarhlutfallið var 38,2% á fjórðungnum.“

„Síðustu vikur hafa verið viðburðaríkar í rekstri bankans. Tilkynning um samrunaviðræður Íslandsbanka og Skaga hf. er fyrsta skrefið í spennandi vegferð og er í takt við það sem bankinn hefur sagt undanfarin misseri um ytri vöxt. Við sjáum mikil tækifæri í samruna félaganna tveggja og ljóst er að samlegðin er talsverð.“

„Tækifæri til samþættingar innan íslenska fjármálakerfisins eru fjölmörg og teljum við að samruni Íslandsbanka og Skaga geti skapað veruleg verðmæti fyrir sameinað félag, viðskiptavini þess og aðra hagsmunaaðila. Þá hefur samstarf bankans við VÍS (dótturfélag Skaga) gengið afar vel og mikil ánægja meðal viðskiptavina og starfsfólks með samstarfið.“

„Í október kvað Hæstiréttur Íslands upp dóm í máli um breytilega vexti á óverðtryggðu fasteignaláni. Hæstiréttur ógilti skilmála bankans um vaxtabreytingar að hluta. Unnið er að því að greina til fulls áhrif dómsins og mun bankinn hafa frumkvæði að því að hafa samband við viðskiptavini þegar niðurstöður liggja fyrir,“ er haft eftir Jóni í tilkynningu.