Erlent

Ísraelar stunda skipu­lagt niður­rif á heilu bæjunum í trássi við al­þjóða­lög

Rafn Ágúst Ragnarsson skrifar
Ísraelsmenn segja hættu á því að standi heimilin enn geti Hamasliðar notfært sér þau undir hryðjuverkastarfsemi seinna meir.
Ísraelsmenn segja hættu á því að standi heimilin enn geti Hamasliðar notfært sér þau undir hryðjuverkastarfsemi seinna meir. AP

Síðan vopnahlé Ísraels og Hamas lauk í mars síðastliðnum hefur Ísraelsher rifið niður heilu þorpin og hverfin ýmist með sprengingum, vinnuvélum eða hvoru tveggja. Þúsundir bygginga hafa verið jafnaðar við jörðu og sumar þeirra voru lítið sem ekkert skemmdar fyrir. Þetta er brot á Genfarsáttmálanum.

Þetta er á meðal þess sem kemur fram í ítarlegri umfjöllun breska ríkisútvarpsins sem birtist í dag og varpar ljósi á skipulagt niðurrif Ísraelsmanna á heilu samfélögunum á Gasasvæðinu.

Samhliða þessu hafa ísraelskir ráðamenn lýst fyrirætlunum sínum um að reisa svokallaða mannúðarborg á rústum Rafah-borgar. Til stendur að koma um 600 þúsund Palestínumönnum þar fyrir undir ströngu eftirliti og yfirráðum Ísraela. Þetta hefur víða verið fordæmt og innan sem utan Ísraels og „mannúðarborginni“ líkt við gettó nasista.

Í umfjöllun ríkisútvarpsins breska eru tekin fyrir fjörutíu staðfest dæmi um skipulagt niðurrif á íbúðahúsnæði og innviðum þvert á Gasaströndinni en aðallega í Rafah-borg og Khan Younis. Blokkir, ráðhús og skólahús jöfnuð við jörðu af skipulögðum sprengingum.

Heilu samfélögin jöfnuð við jörðu

Tekið er dæmi Tel al-Sultan sem er, eða var, þéttbýlt hverfi Rafah-borgar. Í hverfinu var jafnframt eina mæðradeild sjúkrahúss í borginni. Líkt og meðfylgjandi gervihnattarmyndir sýna var eyðileggingin þar umfangsmikil í mars síðastliðnum. Seinni myndin var tekin í síðustu viku og þar sést að örfá hús standa enn.

Í umfjölluninni er myndband einnig birt sem sýnir gröfumenn standa í ströngu við að rífa niður íbúðablokk. Gervihnattarmyndir varpa einnig ljósi á skipulagða eyðileggingu heilla bæja sem höfðu til þessa ekki orðið fyrir miklu tjóni af völdum loftárása eða átaka á jörðu niðri.

Mæðradeildin er ein fárra bygginga sem enn standa.BBC

Til dæmis í bænum Khuzaa skammt frá landamærum Palestínu og Ísraels. Ísraelsmenn hafa gefið út að þeir hafi þar rifið niður hátt í 1200 byggingar. Allar segja þeir þær vera „hryðjuverkainnviði.“ Sömu sögu er að segja af fleiri tugþúsundmannabyggðum víða á Gasasvæðinu. Myndbönd sem blaðamenn breska ríkisútvarpsins segjast hafa staðfest að séu tekin á Gasasvæðinu sýna niðurrif heilla þyrpinga af íbúðablokkum fleiri kílómetrum frá landamærunum.

Eyðileggingin er skipulögð og nær óímyndunarleg.BBC

Þegar þeir báru myndefnið undir forsvarsmenn ísraelska hersins barst þeim eftirfarandi svar:

„Eins og hefur víða verið staðfest, fela Hamasliðar og önnur hryðjuverkasamtök hernaðarbúnað sinn á þéttbýlum svæðum þar sem óbreyttir borgarar búa. Ísraelski herinn ber kennsl á hryðjuverkainnviði og eyðir þeim sem eru meðal annars staðsettir inni í byggingum á þessum svæðum.“

Bersýnilega brot á alþjóðalögum

Samkvæmt sérfræðingum í alþjóðalögum sem breska ríkisútvarpið ræddi við við gerð umfjöllunarinnar brýtur framferði Ísraela bersýnilega í bága við Genfarsáttmálann sem kveður meðal annars á um skyldur hernámsaðila.

Í umfjölluninni kemur jafnframt fram að á ísraelskum hópum á Facebook hafi á undanförnum mánuðum birst fleiri færslur þar sem auglýst er eftir verktökum til að taka á sig niðurrifsverkefni á Gasasvæðinu. Boðin eru góð laun og að jafnvel húsakostur. Einn verktaki sem fréttamenn breska ríkisútvarpsins ræddi við svaraði: „Farið til fjandans, þið og Gasa.“

Palestínumaður syrgir ungan son sinn sem ísraelski herinn drap í loftárás. Myndin var tekin 13. júlí í Gasaborg.AP

Samkvæmt umfjöllun ísraelskra miðla átti Benjamín Netanjahú, forsætisráðherra Ísraels, fund með þingmönnum ríkisstjórnarinnar þar sem hann sagði þeim meðal annars að til stæði að eyðileggja fleiri og fleiri heimili Palestínumanna til að þeir „ættu ekki í nein hús að venda.“

Síðan Ísraelar gerðu innrás sína á Gasasvæðið hafa þeir drepið hátt í sextíu þúsund manns þar af um sautján þúsund börn.


Tengdar fréttir

Fyrirætlanir um búðir í Rafah vekja ágreining

Fyrirætlanir stjórnvalda í Ísrael um að safna íbúum Gasa saman í búðum á rústum Rafah-borgar hafa vakið deilur, bæði við samningaborðið og milli stjórnvalda og Ísraelshers.

Nýjasta útspil Ísraela á Gasa minni á „lokalausn“ nasistanna

„Auschwitz var ekki mannúðarborg, við skulum orða það þannig,“ segir Guðmundur Hálfdánarson, prófessor í sagnfræði við Háskóla Íslands. Fram kom í fréttum í morgun að Israel Katz, varnarmálaráðherra Ísraels, hafi fyrirskipað hernum að undirbúa flóttamannabúðir, eða „mannúðarborg“ eins og hann kallar það, á rústum Rafah-borgar á Gasa.




Fleiri fréttir

Sjá meira


×