Vinstrikonan um­deilda vann sann­færandi sigur á Ír­landi

Connolly hlaut um 64 prósent atkvæða, gegn 29 prósentum helsta keppinautar síns Heather Humphreys.

Connolly þykir nokkuð umdeild og varð mótframbjóðendum hennar tíðrætt um meintar öfgar hennar í herferðum sínum. Hún er 68 ára gömul og starfaði lengi sem lögmaður og klínískur sálfræðingar. Hún hefur setið á þingi sem óháður þingmaður frá árinu 2016 en áður var hún borgarstjóri Galway á vesturströnd Írlands.

Líkt og fjallað hefur verið um víða hafa ummæli hennar um Hamas sætt gagnrýni en hún lýsti þeim sem „hluta af samfélagsgerð palestínsku þjóðarinnar. Hún hefur deilt á framferði Ísraela á Gasaströndinni harkalega og sagt þá fremja þar hópmorð.

Hún hefur einnig verið gagnrýnin á Evrópusambandið og sérstaklega það sem hún kallar „hervæðingu“ þess. Það vakti litla hrifningu í Þýskalandi þegar hún líkti boðaðri útgjaldaaukningu þeirra til varnarmála við hervæðingu nasista í aðdraganda heimsstyrjaldarinnar síðari.

Embætti forseta Írlands svipar um margt til þess íslenska og hafa forsetar verið mispólitískir í gegnum sögu lýðveldisins. Michael D. Higgins fráfarandi forseti hefur til dæmis gagnrýnt framferði Ísraela á Gasa og aukningu framlaga til Atlantshafsbandalagsins.