Samkaup segja upp tuttugu og tveimur

Heiður Björk Friðjónsdóttir, framkvæmdastjóri Samkaupa, staðfestir í svari við fyrirspurn fréttastofu að Samkaup hafi í dag ráðist í hagræðingaraðgerðir sem fæli í sér niðurlagningu starfa á skrifstofu Samkaupa. Uppsagnirnar taki gildi strax. mbl.is greindi fyrst frá. Alls unnu 56 starfsmenn á skrifstofunni, að sögn Rúv. 

Heiður tók við sem framkvæmdastjóri síðustu mánaðamót en Samkaup reka yfir 60 verslanir um land allt. 

Árið 2024 nam tap Samkaupa 900 milljónum króna saman borið við 267 milljóna króna hagnað árið 2023. Í svari sínu nefnir Heiður að rekstrarniðurstaða síðasta árs hafi verið undir væntingum og því mikilvægt að bregðast við því.

Hjá Samkaup starfa um 1250 starfsmenn í rúmlega 660 stöðugildum, samkvæmt upplýsingum á vefsíðu Samkaupa. Helstu verslanamerki Samkaupa eru Nettó, Kjörbúðin, Krambúðin, Háskólabúðin, Iceland og Samkaup strax.

„Aðgerðirnar eru liður í því að styrkja rekstur Samkaupa til framtíðar. Uppsagnir taka ekki til verslana fyrirtækisins, þar sem við höldum áfram að veita viðskiptavinum okkar framúrskarandi þjónustu og gæðavörur á samkeppnishæfu verði,“ skrifar Heiður.

Samkaup er í eigu Orkunnar, sem er dótturfélags Skeljar fjárfestingafélags en í maí runnu Heimkaup og Samkaup saman. Í maí greindi Innherji frá því  að virði Samkaupa hafi verið metið á tæplega fimmtíu prósent lægra gengi heldur en þegar ráðist var í hlutafjárhækkun fyrir nokkrum mánuðum síðan.