ÍR-ingar næla sér í leik­mann úr Ís­lands­meistara­liði Stjörnunnar

Kristján Fannar Ingólfsson gerði tveggja ára samning við ÍR en áður hafði Júlíus Orri Ágústsson farið til Tindastóls.

Kristján Fannar ólst upp í Keflavík og færði sig yfir í Garðabæinn ungur að aldri og vann bæði bikarmeistaratitil 2021 og Íslandsmeistaratitil 2025.

Á alþjóðavettvangi varð hann Norðurlandameistari með tuttugu ára landsliðinu sumarið 2024 og hefur verið fastamaður í öllum yngri landsliðum Íslands. Nú í sumar tekur hann þátt í sínu síðasta verkefni með yngri landsliði.

Kristján fékk aðeins að spila í tólf og hálfa mínútu samanlagt í allri úrslitakeppni í vor og skoraði bara eitt stig. Í deildarkeppninni var hann með 2,1 stig að meðaltali á 6,4 mínútum í leik.

„Við erum að fá inn leikmann sem er ungur, hungraður og með gríðarlegt potential. Kristján hefur sýnt að hann er tilbúinn í næsta skref og við teljum hann eiga framtíðina fyrir sér í efstu deild. Hann passar fullkomlega í það sem við erum að byggja hér. Ungur, metnaðarfullur og óhræddur við að taka ábyrgð. Ég er mjög spenntur að fá að vinna með honum“ segir Borche Ilievski, þjálfari ÍR, á miðlum félagsins.