Erlent

Mun þingið fara fram hjá Trump?

Samúel Karl Ólason skrifar
Mike Johnson, forseti fulltrúadeildarinnar, segir mikinn stuðning fyrir hertum refsiaðgerðum gegn Rússum á þingi.
Mike Johnson, forseti fulltrúadeildarinnar, segir mikinn stuðning fyrir hertum refsiaðgerðum gegn Rússum á þingi. AP/Rod Lamkey, Jr.

Mike Johnson, forseti fulltrúadeildar Bandaríkjaþings, sagðist í gær styðja hertar refsiaðgerðir gegn Rússlandi vegna innrásarinnar í Úkraínu. Áhugi fyrir slíkum aðgerðum er mikill í þinginu og þá sérstaklega í öldungadeildinni en hingað til hefur Donald Trump, forseti, ekki viljað taka það skref.

„Það eru margir þingmenn sem vilja að við beitum Rússland eins kröftugum refsiaðgerðum og við getum,“ sagði Johnson við blaðamenn í gær. „Ég er stuðningsmaður þess.“

Lindsey Graham og Richard Blumenthal, öldungadeildarþingmenn Repúblikanaflokksins og Demókrataflokksins, hafa samið frumvarp sem myndi herða refsiaðgerðir gegn Rússlandi til muna, verði það að lögum.

Samkvæmt frumvarpinu myndu Bandaríkin setja fimm hundruð prósenta toll á vörur frá öllum ríkjum sem kaupa olíu og/gas frá Rússlandi en það er helsta tekjulind rússneska ríkisins.

Graham segir 82 aðra þingmenn hafa lýst yfir stuðningi við frumvarpið og sagði hann í Úkraínu í síðustu viku að það yrði mögulega lagt fyrir öldungadeildina í þessari viku. Með miklum stuðningi í báðum deildum þingsins væri mögulegt að gera frumvarpið að lögum án þess að Trump veiti því blessun sína.

Graham skrifaði í morgun færslu á X um ummæli Dmitrís Medvedev, fyrrverandi forseta Rússlands, fyrrverandi forsætisráðherra og sitjandi varaformanns öryggisráðs Rússlands, um að friðarviðræðunum við Úkraínumenn væri ekki ætlað að koma á friði. Þeim væri þess í stað ætlað að hjálpa Rússum að sigra Úkraínu.

Sjá einnig: Með sömu óásættanlegu kröfurnar

Þakkaði Graham Medvedev fyrir að gera afstöðu Rússa skýra.

Hefur oft sagst íhuga aðgerðir

Trump gaf nýverið til kynna að hann hafi staðið í vegi hertra refsiaðgerða gegn Rússlandi vegna innrásarinnar. Þá sagði hann Pútín vera að leika sér að eldinum vegna ítrekaðra árása Rússa á borgi og bæi Úkraínu.

„Það sem Vladimír Pútín veit ekki er að ef ekki væri fyrir mig, væru allskonar slæmir hlutir að gerast í Rússlandi og ég meina VIRKILEGA SLÆMIR,“ skrifaði Trump á samfélagsmiðil sinn í síðasta mánuði.

Sjá einnig: „Hann er að leika sér að eldinum!“

Forsetinn bandaríski hefur ítrekað gefið til kynna að hann sé að skoða að herða refsiaðgerðir gegn Rússlandi en það hefur þó aldrei gerst. Þess í stað hefur hann gefið til kynna Bandaríkjamenn muni ganga frá borðinu, ef svo má segja, og jafnvel hætta stuðningi við Úkraínumenn.

Slíkt yrði mikill sigur fyrir Pútín og Rússa og myndi gera Úkraínumönnum varnirnar erfiðari.

Bandaríkin Donald Trump Rússland Úkraína Innrás Rússa í Úkraínu Vladimír Pútín

Tengdar fréttir

Vill sameina þjóðina um hernaðaruppbyggingu

Bretar ætla að fjölga kjarnorkuknúnum kafbátum sínum og gera aðrar breytingar sem ætlað er að auka getu ríkisins til að heyja nútímastríð. Keir Starmer, forsætisráðherra, segist ætla að auka fjárútlát til varnarmála í þrjú prósent af landsframleiðslu en vill ekki segja hvernær ná á þeim áfanga.

Koma aftur saman eftir sögulegar árásir í Rússlandi

Úkraínskir og rússneskir erindrekar munu setjast við samningaborðið í Istanbúl í dag. Er það í kjölfar umfangsmikillar árásar Úkraínumanna á nokkra flugvelli í Rússlandi, þar sem mikilvægar sprengjuflugvélar og eftirlitsvélar eru meðal annars hýstar.

„Köngulóarvefur“ sem skrifað verður um í sögubókum

Vólódímír Selenskí, forseti Úkraínu, sagði Úkraínuher gera allt til að láta Rússa finna fyrir þörf til að enda stríðið. Úkraínuher gerði umfangsmiklar árásir á nokkra herflugvelli Rússa í dag. Forsetinn segist yfir sig ánægður með aðgerðina.

Mest lesið


Fleiri fréttir

Sjá meira


×

Mest lesið