Jón Ólafur í fram­boði til for­manns SA

Fyrr í morgun var greint frá því að Eyjólfur Árni Rafnsson, núverandi formaður Samtaka atvinnulífsins, ætli ekki að gefa kost á sér aftur á aðalfundi samtakanna sem fer fram 15. maí næstkomandi.

Greint er frá framboði Jóns Ólafs á vefsíðu SA. Jón Ólafur sat einnig í stjórn Samtaka verslunar og þjónustu frá árinu 2017 og var formaður samtakanna um sex ára skeið.

„Með því að bjóða mig fram sem formaður Samtaka atvinnulífsins er ég að bjóða fram krafta mína í þágu verðmætasköpunar, viðskiptafrelsis, einkaframtaks og alþjóðaviðskipta sem allt eru undirstöðuþættir velgengni í íslensku atvinnulífi,“ er haft eftir Jóni Ólafi í tilkynningu.

„Eitt af meginverkefnum samtakanna eru samskipti við stéttarfélög og gerð kjarasamninga fyrir hönd aðildarfyrirtækja en ég hef um árabil verið talsmaður þess að forsvarsmenn fyrirtækja taki virkan þátt í þeim.“