Einn stofn­enda Pirate bay lést í flug­slysi

Frá þessu var greint á Facebooksíðu Alternativ för Sverige, sænsks stjórnmálaflokks sem er lengst til hægri á hinum pólitíska ás. Lundstrom var virkur félagi í flokknum.

„Goðsögn sænskrar þjóðernishyggju“

„Lundström, gamalreynd goðsögn sænskrar þjóðernishyggju, lést í flugslysi á mánudag,“ sagði í færslunni, sem stjórn flokksins skrifar undir.

Í færslunni segir að Lundstrom hafi verið á leið frá Zagreb í Króatíu til Zürich í Sviss á flugvél sinni af gerðinni Piper Mooney Ovation M20R. Í frétt The Independent um slysið segir að flugvélin hafi brotnað í tvennt þegar hún lenti á fjallakofa í hlíðum Velika Planina í norðurhluta Slóveníu á mánudag. 

Slæmt veður á vettvangi hafi gert það að verkum að viðbragðsaðilar komust ekki að braki flugvélarinnar og líki Lundstroms fyrr en daginn eftir. Slæmt veður hafi að öllum líkindum orsakað slysið.

Fjarskipti og hrökkbrauð

Lundstrom var 64 ára þegar hann lést. Hann var helst þekktur fyrir að hafa komið að stofnun deilisíðunnar Pirate bay, sem er ein sú stærsta sinnar tegundar í sögunni. Hans aðkoma að síðunni var helst í gegnum fjarskiptafélag í hans eigu, sem sá síðunni fyrir þjónustu og búnaði.

Hann hlaut fjögurra mánaða fangelsisdóm árið 2012 vegna brota margvíslegra og alvarlegra brota Pirate bay á höfundarréttarlögum.

Þá má geta þess að íslenskir neytendur sem hafa ekki stundað ólöglegt niðurhal gætu þó hafa stundað viðskipti við Lundstrom, enda var hann erfingi Wasaveldisins, sem framleiðir hrökkbrauðið vinsæla Wasabröd.