Sektuð vegna full­yrðinga um aukinn hár­vöxt og minni hrukkur

Neytendastofa komst að þeirri niðurstöðu að umræddar fullyrðingar teldust undir öllum kringumstæðum óréttmætar, en þær vörðuðu vörur undir merkinu Lifewave.

Minni verkir á fyrsta degi og fleira

Í febrúar á þessu ári óskaði Neytendastofa eftir skýringum á fjórtán fullyrðingum sem gengu út á að án efna eða lyfja væri hægt að virkja stofnfrumur, þá myndu vörurnar leiða til aukningar á kollageni, draga úr hrukkum, auka hárvöxt, lækka æðaaldur og leiða til minnkunar verkja og bólgna á fyrsta degi. Þar að auki myndu sár gróa hraðar, og vörurnar hafa áhrif á gæði svefns og þá myndu þau jafnvel bæta andlega líðan og vinna gegn streitu og kvíða.

Í svörum félagsins X20 Lausnir sagði að félagið væri ekki selja neinar vörur frá Lifewave, en öll kaup færu beint í gegnum framleiðandann lifewave.com. Vefsíða X20 Lausna, lifsbylgja.is væri upplýsingasíða fyrirtækisins með almenna umfjöllun um vörunnar.

Þá sagði að allar vörur Lifewave byggi á rannsóknum og vísindum unnum af færum vísindamönnum sem styddu áðurnefndar fullyrðingar. Í svörum X20 fylgdu margir hlekkir að greinum og rannsóknum tengdum

Málinu ekki lokið þrátt fyrir breytingu

Fram kemur í úrskurði Neytendastofu í málinu að undir rekstri málsins hefði umferð á lifsbylgju.is verið vísað á aðra vefslóð, x39lifestyle.wixsite.com/x-39.

„Það að umferð vefsíðu sé beint á aðra vefsíðu með .com endingu getur þó ekki leitt til þess að málsmeðferð verði sjálfkrafa lokið. Umræddar fullyrðingar X20 Lausna ehf. um Lifewave vörur á vefsíðunni lifsbylgja.is voru afdráttarlausar að því er varðar virkni varanna og þann árangur sem neytendur mættu vænta af notkun þeirra,“ segir í úrskurðinum.

Þá segir að X20 Lausnir hefðu hvergi tilgreint með skýrum hætti hvar sannanir fyrir fullyrðingunum væri að finna í þeim gögnum sem félagið sendi stofnuninni.

Ranglega haldið fram að vörurnar geti læknað sjúkleika

Það var mat Neytendastofu að fullyrðingar X20 Lausna veittu rangar upplýsingar sem yrðu til þess að neytendur taki viðskiptaákvörðun sem þeir annars hefðu ekki tekið

„Þá eru fullyrðingarnar líklegar til að raska verulega fjárhagslegri hegðun neytenda. Að mati stofnunarinnar eru umræddar fullyrðingar ennfremur settar fram með þeim hætti að því er haldið fram að vörurnar geti haft virkni á ýmsa kvilla líkt og um lyf sé að ræða. Telur Neytendastofa að með birtingu á framangreindum fullyrðingum um virkni Lifewave vara hafi félagið haldið því ranglega fram að vörurnar geti læknað sjúkleika eða röskun á líffærastarfsemi.“

Neytendastofa segir að brot félagsins hafi verið alvarleg og að þau stríði gegn góðum viðskiptaháttum. Líkt og áður segir lagði stofnunin hundrað þúsund króna stjórnvaldssekt á X20 Lausnir.