Enn allt í járnum skömmu fyrir kjör­dag

Í nýrri könnun New York Times og Siena háskólans mældust þau bæði með 48 prósenta fylgi á landsvísu.

Í síðustu forsetakosningum í Bandaríkjunum hafa Demókratar iðulega notið forskots á landsvísu, þó þeir hafi tapað í kjörmannakerfi Bandaríkjanna. Könnun NYT og Siena bendir til þess að staða Harris hafi versnað, þó breytingarnar milli kannana miðilsins mælist innan skekkjumarka.

Þegar kemur að meðaltali kannanna á landsvísu mælist Harris enn með naumt forskot á Trump. Hjá tölfræðimiðlinum FiveThirtyEight mælist Harris með 48,2 prósenta fylgi á landsvísu en Trump með 46,4 prósent.

Kannanir í þeim sjö ríkjum sem skipta hvað mestu máli þetta árið, í Arizona, Georgíu, Michigan, Nevada, Norður-Karólínu, Pennsylvaníu og Wisconsin, benda einnig til þess að hnífjafnt sé á milli Harris og Trumps.

Harris mælist samkvæmt NYT með mjög naumt forskot í fjörum ríkjanna. Það er í Pennsylvaníu, Nevada, Wisconsin og í Michigan en í öllum fjórum er munurinn undir einu prósentustigi.

Trump mælist með forskot í Norður-Karólínu (undir einu prósentustigi), Georgíu (rúmt prósentustig) og í Arizona (rúm tvö prósentustig).

Sækja á forskot hins

Samkvæmt könnun Reuters og Ipsos virðist sem Trump hafi tekist að þurrka út forskot Demókrataflokksins þegar kemur að karlmönnum af latneskum uppruna. Harris mælist þar með tveggja prósentustiga forskot á Trump, 44 gegn 46. Joe Biden mældist með nítján prósentustiga forskot þar í kosningunum 2020.

Á undanförnum áratugum hafa Demókratar verið mun vinsælli meðal kjósenda af latneskum ættum en Trump hefur saxað verulega á það forskot. Honum hefur einnig vaxið ásmegin hjá þeldökkum karlmönnum og mælist með átján prósenta stuðning meðal þeirra. Árið 2020 var stuðningurinn fjórtán prósent.

Harris hefur þó saxað á forskot Trumps gegn Biden árið 2020 þegar kemur að hvítum konum. Trump var þar með tólf prósentustiga forskot á Biden en þær styðja frekar Harris en Trump, með 46 prósent gegn 43.

Pirringur á vinstri væng Harris

Harris hefur á undanförnum dögum varið töluverðu púðri í að reyna að ná til fólks sem hefur yfirleitt kosið Repúblikanaflokkinn en hefur áhyggjur af Trump og vill ekki kjósa hann. Repúblikaninn Liz Cheney hefur tekið þátt í þessari viðleitni Harris og hafa þær meðal annars reynt að segja kjósendum Repúblikanaflokksins, og þá helst konum, að þær þurfi ekki að segja neinum ef þær kjósa Harris.

AP fréttaveitan segir að á sama tíma og Harris hafi horft á hægri væng bandarískra stjórnmála eftir mögulegum kjósendum, hafi hún verið vöruð við því að hún sé að tapa kjósendum lengst til vinstri.

Hún er sögð hafa lagt of mikla áherslu á að laða til sín hægri sinnað fólk og hætt sé við því að sú viðleitni hafi fælt vinstri sinnað fólk frá.

Þá eru leiðtogar á vinstri vængnum sagðir pirraðir yfir því að fólk eins og eins og Bernie Sanders og Alexandria Ocasio-Cortez hafi verið sett á hliðarlínurnar fyrir hægri sinnað fólk eins og Liz Cheney og auðjöfurinn mark Cuban.

Sanders sagði til að mynda í samtali við AP að Harris þyrfti að tala meira til vinnandi fólks. Þau mið væru mun gjöfulli.

„Ég vildi að þetta hefði gerst fyrir tveimur mánuðum síðan. Svona er þetta,“ sagði Sanders.

Ráðgjafar Harris segja hins vegar að þessi viðleitni hennar við að ná til hægri sinnaðra kjósenda snúist um einfalda stærðfræði. Þeir telja að um tíu prósent kjósenda í mikilvægu ríkjunum sjö séu enn ekki fullákveðnir um hvern þeir vilji kjósa.

Sjö af þessum tíu prósentum tilheyri hópi sem kalla megi „Cheney-Repúblikana“ sem taki skilaboðum Harris og Cheney vel.

Þessari viðleitni er einnig ætlað að sporna gegn þeirri hugmynd að Harris sé of vinstri sinnuð, sem hefur verið vinsæll liður í árásum Trumps í hennar gerð.