Sér ekki á svörtu hjá „hinum út­valda“

Í þættinum var farið yfir stöðuna í skoðanakönnunum en hvernig sem á það er litið munar svo litlu á fylgi Kamölu Harris og Donald Trump að vart sér á milli. 

Samkvæmt útreikningum New York Times er Harris nú með um tveggja prósents forskot á Trump ef horft er til skoðanakannanna fyrir landið allt. Vegna dreifingar kjörmanna þarf hún á bilinu þriggja til fimm prósents forskot til að eiga möguleika á að sigra Trump.

Trump hefur sótt nokkuð á og mælist nú með tveggja prósents forskot í tveimur af sjö barátturíkjum; Arizona og Georgíu. Harris er með forskot í fjórum ríkjum; Michigan, Nevada, Pennsylvaníu og Wisconsin, en það nær ekki heilu prósenti.

Jafnt er með frambjóðendunum í Norður-Karólínu.

Von á „október-surprise“?

Baráttan stendur í raun um 93 kjörmenn í barátturíkjunum sjö, þar sem menn gera almennt ráð fyrir því að Harris tryggi sér 226 í öðrum ríkjum og Trump 219. Kjörmennirnir eru 538 talsins; hvert ríki fær einn kjörmann fyrir hvern þingmann og þá fær Washington D.C. þrjá kjörmenn.

Sama hvert litið er þá hafa skoðanakannanir verið að sveiflast um nokkur prósentustig til og frá, bæði á landsvísu og í barátturíkjunum. Í Baráttan um Bandaríkin á þriðjudag voru skoðaðar nýjustu niðurstöður frá þeim könnunarfyrirtækjum sem þykja hvað áreiðanlegust en þar má vel sjá umrædda sveiflu.

Friðjón sagið þó ekki hægt að útiloka neitt og að úrslit gætu mögulega komið á óvart. Íbúar Alaska hafi til að mynda aðeins einu sinni kosið Demókrata, Lyndon B. Johnson árið 1964.

„En svo birtist allt í einu könnun... því það var Demókrati sem vann eina þingsæti í fulltrúadeildinni; kona af uppruna innfæddra vann eina þingsætið í síðustu kosningum og allt í einu er munurinn orðinn bara fimm prósent í síðustu könnun, sem var tekin fyrir einhverjum mánuðum síðan. Þannig að Demókratar eru að gæla við að þeir eigi kannski séns í Alaska, af öllum ríkjum.“

Sama sé að gerast í Texas þar sem munurinn á Repúblikananum Ted Cruz og Demókratanum Colin Allred í baráttunni um öldungadeildarþingsæti hefur verið innan skekkjumarka.

„Þetta eru fantasíurnar,“ svarar Friðjón, spurður að því hvort þetta sé þó ekki langsótt.

Trump trúi því að guð hafi sent hann og bjargað honum

Utankjörfundaratkvæðagreiðslur eru hafnar í nokkrum ríkjum og segir Friðjón tíðindi frá Pennsylvaníu, sem er með flesta kjörmenn barátturíkjanna, uppörvandi fyrir Demókrata, þar sem svartir séu að kjósa í auknum mæli og kosningaþátttaka sé góð á þéttbýlissvæðinu Philadelphiu.

Friðjón segir gang utankjörfundaratkvæðagreiðsla og kjörsókn í einstaka sýslum verða mun áhugaverðari en niðurstöður skoðanakannana nú á lokametrunum, nema fyrir einhver „október-surprise“.

„Það sér ekki á svörtu hjá honum,“ sagði Friðjón um Trump en ekkert þeirra mörg hneykslismála sem upp hafa komið í tengslum við forsetann fyrrverandi síðustu mánuði og ár virðist hafa dregið úr vinsældum hans.

„Hann sagði núna í vikunni að hann vildi kalla til herinn, til að tryggja öryggi kosninga og smala saman því sem hann kallaði „öfga vinstrinu“ og hvað...? Hvað ætlar hann að gera? Láta herinn smala pólitískum andstæðingum og tryggja það að kosningunum verið ekki stolið? Þetta er bara valdarán.“

Þegar það barst í tal að Trump yrði mögulega frjálslyndasta manneskjan í Hvíta húsinu ef hann kæmist aftur til valda, sagðist Friðjón reyndar telja að hann og skoðanir hans hefðu raunverulega breyst.

Trump hefði verið fylgjandi þungunarrofi þegar hann var að „halda við konur hægri vinstri“ en nú væri annað uppi.

„Hann talar núna um að guð hafi bjargað honum frá byssuskotinu í Butler.“

Heldur þú að hann trúi því?

„Sko hann trúir því að hann sé útvalinn... ég held að hann trúi því. Ég held að hann trúi því að hann sé sérstakur erindreki kominn til þess að vera á jörðinni.“