„Á­byrgð ríkisins og Banka­sýslunnar rík“

„Óumdeilt var að bankinn hafði brotið gegn lögum við framkvæmd útboðsins. Fyrir hönd stjórn Íslandsbanka bið ég alla hlutaðeigandi afsökunar á slakri framkvæmd bankans á þessu verkefni.“ 

Þetta sagði Finnur Árnason, fráfarandi stjórnarformaður Íslandsbanka, á hluthafafundi sem fór fram á Grand hóteli í Reykjavík í morgun. Fundurinn hófst á því að farið var yfir sátt Íslandsbanka við fjármálaeftirlit Seðlabanka Íslands vegna annars útboðs á hlut ríkisins í bankanum.   

Áhættumenning heilt yfir mjög sterk í bankanum

Jón Guðni Ómarsson, sem tók við starfi bankastjóra eftir að Birna Einarsdóttir lét af störfum, tók undir afsökunarbeiðni Finns í ræðu sinni áður en hann kynnti aðgerðaáætlun til að bregðast við ábendingum fjármálaeftirlitsins. Áætlunin felst meðal annars í upptöku símtala, áhættumati og flokkun á fjárfestum.

„Og almennt að styrkja áhættumenningu þvert yfir bankann,“ sagði Jón Guðni í samtali við fréttastofu að loknum fundinum. Hann sagðist mjög sáttur með nýkjörna stjórn, sem sé öflug og breið.

Einhverjir hafa líkt útboðsferlinu við þau vinnubrögð sem viðhöfðust í íslenskum bönkum á fyrirhrunsárunum. Jón Guðni segir það rétt að mjög litlu leiti.

„Heilt yfir er áhættumenningin mjög sterk í bankanum. Þarna voru vissir veikleikar sem komu fram í henni og við þurfum bara að tækla það. Það hafa orðið gríðarlega miklar breytingar frá hruni á öllu kerfi í kringum bankann og regluverki. Heilt yfir stendur bankinn og bankar á Íslandi sterkum fótum,“ segir Jón Guðni. 

Verkið hafi verið sérstakt og mistökin ekki merki um það að bankinn sé ófær um útboð almennt í fyrirtækjum.

„Við þurfum að tryggja varðandi svona verkefni og önnur flóknari verkefni að við séum með ferla og utanumhald til að tryggja að við getum sinnt svona verkefnum.“

Þurfi að hafa jafnvægi milli innanbúðarfólks og nýliða

Jón hefur starfað hjá bankanum í rúma tvo áratugi og einhverjir hluthafar veltu fyrir sér hvort innanbúðarfólk væri besti valkosturinn til að leiða bankann inn í nýtt tímabil.

„Til að skapa traust, ekki bara meðal hluthafa heldur almennings, hefði ég talið að farsælast hefði verið að ráða utanaðkomandi aðila til að koma inn,“ sagði Ólafur Hannesson, hluthafi í bankanum, og beindi því til nýrrar stjórnar að íhuga þá afstöðu. 

„Ég held að það sé mikilvægt að það sé ákveðið jafnvægi milli fólks sem vinnur inni í bankanum og stígur upp og einnig að fá nýja vinda inn í fyrirtæki. Það er eitthvað sem á endanum þarf að skoða. Eitt af því sem við þurfum að tryggja er að það sé vel mannað,“ segir Linda Jónsdóttir, nýr stjórnarformaður, í samtali við fréttastofu við þessu. 

Linda var sjálfkjörin stjórnarformaður á fundinum en hún bauð sig fram til stjórnar auk ellefu annarra. Fjórir þeirra sátu þegar í stjórn bankans og hlutu þrjú þeirra kjör að nýju. Auk þeirra voru Haukur Örn Birgisson hæstaréttarlögmaður, Helga Hlín Hákonardóttir ráðgjafi hjá Strategíu, Stefán Pétursson fjármálastjóri EpiEndo Pharmaceuticals og Linda, framkvæmdastjóri rekstrar hjá Marel, kjörin. 

Óákveðið hvort starfslokakjör verði endurskoðuð

Háar gagnrýnisraddir hafa heyrst vegna starfslokasamninga þriggja yfirmanna sem létu af störfum vegna málsins. Birna er til að mynda með tólf mánaða uppsagnarfrest sem hljóðar upp á 56,6 milljónir.

Eru starfslokasamningar og kjör eitthvað sem mun koma til endurskoðunar? 

„Ég myndi segja að stjórnin er búin að skipta með sér verkum og meðal þeirra málefna sem koma inn á borð stjórnar eru starfslokamál er það eitthvað sem við munum skoða. Ég vil ekki svara því í smáatriðum á þessari stundu,“ segir Linda. 

Ábyrgð liggi hjá fleirum en Íslandsbanka

Nýkjörinn stjórnarmaður segir bankann ekki einan ábyrgan í málinu.

„Það á eftir að klára rannsóknir á því frá upphafi til enda. Ég kem með þekkingu á stjórnarháttum fyrirtækja í opinberri eigu. Ábyrgð ríkisins sem eiganda og Bankasýslunnar sem handhafa stærsta hluthafarins í bankanum er rík,“ segir Helga Hlín Hákonardóttir, nýkjörinn stjórnarmaður í Íslandsbanka.

Jón Gunnar Jónsson, forstjóri Bankasýslu ríkisins, var viðstaddur fundinn en vildi ekki veita viðtal. Hann sagði afstöðu bankasýslunnar liggja skýrt fyrir en nýlega sagði hann útboðið farsælasta hlutafjárútboð Íslandssögunnar.

„Það fer eftir því hvernig á það er litið. Ef þú vilt líta á fjármálalega niðurstöðu fyrir ríkið þá kann það að vera en ég held að við sjáum að afleiðingar og umræða hafi verið skaðleg og hefði verið betra að vera laus við það og gera söluna enn farsælli.“