Þúsundir manna bíða konungshjónanna nú þegar á götum Lundúnaborgar

Þetta verður í fyrsta skipti sem krýning fer fram í Bretlandi í sjötíu ár eða frá því Elísabet II var krýnd árið 1953 aðeins 26 ára gömul en Karl er 74 ára. Búist er við hundruð þúsunda manna komi saman til að fylgjast með för konungshjónanna frá Buckingham höll í fyrramálið að Westminster Abbey dómkirkjunni þar sem athöfnin fer fram. Þúsundir manna hafa nú þegar komið sér fyrir meðfram götum á leiðinni og margir jafnvel tjaldað.

Thomas Darwood frá Essex er einn þeirra sem mættur er á svæðið og segist elska breska konungsveldið.

„Ég dáist að Karli konungi og konungsfjölskyldunni. Ég elska þau afar mikið. Ég bið fyrir þeim og ég vona að hann eigi frábæra valdatíð," segir Darwood.

Margir koma langt að enda ná vinsældir konungsfjölskyldunnar út fyrir Bretland og jafnvel Samveldið. Angie Lopez frá New York er að láta æskuloforð rætast.

„Ég lofaði sjálfri mér því þegar ég var ung stúlka að ég myndi koma í krýninguna þegar að því kæmi. Ég gaf sjálfri mér þetta loforð og hingað er ég komin," segir Lopez.

Fjöldi bygginga í Lundúnum og öðrum borgum og bæjum Bretlands hafa verið skreytt í tilefni dagsins og þúsundir skipulagðra götusamkvæma verða víðs vegar um landið. Sumir voru svo heppnir að hitta konunginn sjálfan þegar hann kom heim í Buckingham höll í dag af æfingu í Westminster Abbey.

Vilhjálmur prins af Wales og Katrín prinsessa ferðuðust með nýrri línu í neðanjarðarlestarkerfi Lundúna í dag sem kennd er við Elísabetu II. Mikið álag verður á almenningssamgöngukerfinu í Bretlandi á morgun og sendu konungshjónin landsmönnum raddskilaboð vegna þess í dag.

Karl sagði þau hjónin óska þess að fólk ætti dásamlegan krýningardag. Kamila óskaði öllum á faraldsfæti öruggra og þægilegra ferða. Og Karl endaði á kunnuglegri viðvörun í lestum Bretlands, „Mind the gap“ eða gætið ykkar á bilinu.

Íslensku forsetahjónin verða meðal um fjörutíu þjóðarleiðtoga sem verða viðstaddir krýninguna á morgun. Þeirra á meðal eru japönsku keisarahjónin og annað konungborið fólk í Evrópu, Olena Zelenska forsetafrú Úkraínu og forsætisráðherrar og forsetar þeirra 54 ríkja sem tilheyra breska Samveldinu. En Karl er einnig konungur 15 þeirra. Karl verður fertugasti konungurinn eða drottningin til að vera krýndur í Westmister Abbey frá árinu 1066.

„Ef ég má setja þetta í samhengi þá hafa á síðustu 200 árum orðið fleiri almyrkvar á sólu en krýningar. Þær hafa bara verið sjö," segir Michael Cole fyrrverandi hirðfréttamaður BBC.

Bein útsending verður frá krýningarhátíðinni á Vísi og Stöð 2-Vísi frá klukkan 8:45 í fyrramálið til klukkan um 13:30. Heimir Már Pétursson fréttamaður mun lýsa því sem fram fer.