Haukar upp í annað sætið eftir stór­sigur á Breiða­bliki

Eftir hæga byrjun settu Haukar í fluggírinn og pökkuðu Blikum saman með 43 stiga mun. Lokatölur í Ólafssal 88-45 og Haukar enda því Subway-deildina í 2. sæti. Næst á dagskrá er úrslitakeppnin þar sem efstu fjögur liðin; Keflavík, Haukar, Valur og Njarðvík mætast.

Haukar dreifðu álaginu vel í kvöld og alls skoruðu fimm leikmenn 10 stig eða meira. Stigahæst var Keira Robinson með 14 stig ásamt því að taka 15 fráköst og gefa 6 stoðsendingar.

Þar á eftir kom Elísabeth Ýr Ægisdóttir með 12 stig og 6 fráköst. Í liði Blika skoraði Anna Soffía Lárusdóttir 14 stig.

ÍR vann óvæntan eins stigs sigur á Grindavík í kvöld, lokatölur 77-76. Frábær fyrsti leikhluti lagði grunninn að sigrinum en Grindavík vann síðasta fjórðung með 13 stigum. Það dugði þó ekki til í kvöld. ÍR endar tímabilið með aðeins þrjá sigra en tveir af þeim komu í síðustu tveimur umferðum deildarinnar.

Greeta Uprus skoraði 19 stig í liði ÍR og tók 8 fráköst. Hjá Grindavík var Danielle Rodriguez stigahæst með 23 stig og 6 fráköst.